हिजबुल्लाहको निःशस्त्रीकरण नेतान्याहुको मुख्य एजेन्डा
हाम्रा कुरा
प्रकाशित २०८२ चैत २७ शुक्रबार
1.8k
Shares
काठमाडौँ । इजरायली प्रधानमन्त्री बेन्जामिन नेतान्याहुले हिजबुल्लाहलाई निशस्त्र पार्न र दुई देशबीच 'शान्ति सम्बन्ध' स्थापना गर्ने उद्देश्यले लेबनानसँग प्रत्यक्ष वार्ता गर्न आफ्नो मन्त्रिपरिषद्लाई आदेश दिएको बिहीबार बताएका छन्। प्रधानमन्त्री कार्यालयले जारी गरेको एक विज्ञप्ति मार्फत उनीले यस ऐतिहासिक कदमको बारेमा जानकारी दिएका हुन्।
प्रधानमन्त्री नेतान्याहुको कार्यालयद्वारा जारी विज्ञप्तिमा भनिएको छ, “इजरायलसँग प्रत्यक्ष वार्ता सुरु गर्न लेबनानले बारम्बार गरेको अनुरोधलाई ध्यानमा राख्दै मैले हिजो मन्त्रिपरिषद्लाई जतिसक्दो चाँडो लेबनानसँग प्रत्यक्ष वार्ता प्रक्रिया अगाडि बढाउन निर्देशन दिएको छु।”
उक्त वार्ता विशेषगरी हिजबुल्लाह समूहको निःशस्त्रीकरण र इजरायल एवं लेबनानबीच स्थायी शान्ति सम्बन्ध कायम गर्ने विषयमा केन्द्रित रहने बताइएको छ। लेबनानका प्रधानमन्त्रीले बेरुतलाई असैन्यीकरण गर्न गरेको आह्वानलाई इजरायलले सकारात्मक रूपमा लिँदै त्यसको सराहना गरेको समेत विज्ञप्तिमा उल्लेख छ।
दशकौँदेखिको द्वन्द्व र हालैका सैन्य तनावका बीच सुरु हुन लागेको यो वार्तालाई मध्यपूर्वको राजनीतिमा एक महत्त्वपूर्ण मोडका रूपमा हेरिएको छ। अमेरिकी विदेश मन्त्रालयले समेत अर्को हप्ता वासिङ्टनमा यस विषयमा छलफल आयोजना गर्ने तयारी गरिरहेको अन्तर्राष्ट्रिय सञ्चारमाध्यमहरूले जनाएका छन्। दुवै देशका उच्च कूटनीतिज्ञहरू सम्मिलित हुने यस वार्ताले यस क्षेत्रमा स्थिरता ल्याउने अपेक्षा गरिएको छ।
