काठमाडौँ । फ्लोरिडा अन्तर्राष्ट्रिय विमानस्थलको नाम परिवर्तन गरी अमेरिकी राष्ट्रपति डोनाल्ड ट्रम्पको नाममा राखिने घोषणा गरिएको छ। राष्ट्रपतिका छोरा एरिक ट्रम्पले सामाजिक सञ्जाल 'एक्स' (ट्विटर) मार्फत अब यस विमानस्थलको नाम “डोनाल्ड जे ट्रम्प अन्तर्राष्ट्रिय विमानस्थल” रहने जानकारी दिएका हुन्।
यस ऐतिहासिक नामाकरणका लागि आवश्यक सहमतिमा हस्ताक्षर भइसकेको र आगामी जुलाई १ देखि यो निर्णय औपचारिक रूपमा लागू हुने जनाइएको छ। एरिक ट्रम्पले यस प्रक्रियामा सकारात्मक भूमिका खेल्ने फ्लोरिडाका गभर्नर रोन डिसान्टिस, महान्यायाधिवक्ता र फ्लोरिडा हाउसका प्रतिनिधिहरूलाई विशेष धन्यवाद दिएका छन्। सीबीएस न्यूजका अनुसार ट्रम्प परिवारले गत फेब्रुअरीमा विमानस्थलको पुनः नामाकरणका लागि आवेदन दर्ता गराएको थियो।
यद्यपि, यो घोषणासँगै केही कानुनी अन्योल पनि देखिएको छ। अमेरिकी संघीय उड्डयन प्रशासनले एक विज्ञप्ति जारी गर्दै हालसम्म यो नाम परिवर्तनलाई आफ्नो तर्फबाट अनुमोदन नगरेको स्पष्ट पारेको छ। त्यसैले जुलाई १ को समयसीमा र उड्डयन प्रशासनको स्वीकृतिबीचको तालमेल कसरी मिल्छ भन्ने चासोको विषय बनेको छ।
