ओली रिहाइको माग गर्दै नाराजुलुस, बबरमहल क्षेत्र अस्तव्यस्त, झाँक्री पनि सहभागी [फोटोफिचर]
हाम्रा कुरा
प्रकाशित २०८२ चैत १५ आइतबार
947
Shares
काठमाडौँ । एमाले अध्यक्ष एवं पूर्व प्रधानमन्त्री केपी शर्मा ओलीलाई रिहाइको माग गर्दै एमालेले देशभर प्रदर्शन गरेको छ । काठमाडौँको बबरमहलमा ट्राफिक व्यवस्था अस्तव्यस्त भएको छ ।
एमाले नेता कार्यकर्ताले जिल्ला प्रशासन कार्यालयमा ज्ञापन पत्र बुझाएसँगै बबरमहल क्षेत्र ठप्प छ । पहिले नाराजुलुससहित काठमाडौँ जिल्ला प्रशासन कार्यालयमा पनि ज्ञापन पत्र बुझाइएको थियो ।
पार्टी केन्द्रीय कार्यालयको बैठकको निर्णयअनुसार रिहाइका लागि ज्ञापनपत्र बुझाउने निर्णय भएको थियो । सोअनुसार आज देशैभरमा जिल्ला प्रशासन कार्यालयमा ज्ञापन पत्र बुझाइएको हो ।
बबरमहलको जुलुसमा एमाले नेतृ एवं राष्ट्रिय सभा सदस्य रामकुमारी झाँक्री पनि सहभागी भइन् ।
'जेन-जी' आन्दोलन दमन सम्बन्धी कसूरमा ओलीलाई शनिबार पक्राउ गरिएको थियो । उनलाई भक्तपुरको गुण्डूस्थित डेराबाट पक्राउ गरिएको हो ।
गत भदौ २३ र २४ गते भएको 'जेन-जी' आन्दोलनका क्रममा भएको मानवीय क्षतिका बारेमा छानबिन गर्न गठित गौरीबहादुर कार्की नेतृत्वको आयोगले दिएको प्रतिवेदनका आधारमा उनीसँगै तत्कालीन गृहमन्त्री रमेश लेखकलाई पक्राउ गरिएको हो ।
आयोगले तत्कालीन प्रधानमन्त्री ओली, गृहमन्त्री लेखक र तत्कालीन प्रहरी महानिरीक्षक चन्द्रकुबेर खापुङको लापरबाही र हेलचेक्र्याइँका कारण आन्दोलनकारीको मृत्यु भएको निष्कर्ष निकाल्दै उनीहरूमाथि अनुसन्धान र अभियोजन गर्न सिफारिस गरेको थियो।
