इरानमा युद्धको बादल: आफ्ना नागरिकलाई तुरुन्त देश छोड्न पोल्याण्डको निर्देशन
हाम्रा कुरा
प्रकाशित २०८२ फागुन ८ शुक्रबार
2.3k
Shares
काठमाडौँ । अमेरिकी राष्ट्रपति डोनाल्ड ट्रम्पले इरानविरुद्ध सैन्य कारबाहीको सङ्केत गरेसँगै पोल्याण्डले आफ्ना नागरिकहरूलाई तत्काल इरान छोड्न आह्वान गरेको छ। पोल्याण्डका प्रधानमन्त्री डोनाल्ड टस्कले बिहीबार एक पत्रकार सम्मेलनमार्फत इरानमा रहेका सबै पोलिस नागरिकलाई सुरक्षित रूपमा स्वदेश फर्कन र कसैलाई पनि इरानको यात्रा नगर्न कडा आग्रह गरेका छन्।
प्रधानमन्त्री टस्कले इरान र अमेरिकाबीचको तनाव 'तातो द्वन्द्व' मा परिणत हुने सम्भावना निकै बढेको बताउँदै सतर्कता अपनाउन जोड दिए। "इरानमा रहेका पोल्याण्डका सबै नागरिकले तुरुन्त देश छोड्नु पर्छ," उनले भने, "अहिलेको अवस्था हेर्दा केही घण्टा वा केही दिनभित्रै इरानबाट बाहिरिने विकल्पहरू बन्द हुन सक्छन्, त्यसैले समयमै निर्णय लिनु आवश्यक छ।"
पछिल्ला महिनाहरूमा पोल्याण्ड सरकारले आफ्ना नागरिकहरूलाई इरान छोड्न आग्रह गरेको यो दोस्रो पटक हो। मध्यपूर्वमा बढ्दो तनावका बीच अमेरिकाले इरान नजिकै युद्धपोत, अत्याधुनिक लडाकु विमान र इन्धन भर्ने विमानसहितको ठूलो सैन्य बल परिचालन गरेको छ। राष्ट्रपति ट्रम्पले सैन्य कारबाहीको कुनै पनि आदेश दिएमा जुनसुकै बेला युद्ध सुरु हुन सक्ने भन्दै विश्व समुदायले यसलाई निकै चासोका साथ हेरिरहेको छ।
