विकसित राष्ट्रले जलवायु वित्तपोषण बढाउनुपर्छ: गुटेरेस
हाम्रा कुरा
प्रकाशित २०८२ फागुन ३ आइतबार
2.1k
Shares
काठमाडौँ। संयुक्त राष्ट्रसंघका महासचिव एन्टोनियो गुटेरेसले विकसित राष्ट्रहरूलाई आफ्ना प्रतिबद्धताहरू पूरा गर्न र जलवायु अनुकूलनका लागि विकासोन्मुख देशहरूलाई ठूलो आर्थिक सहयोग उपलब्ध गराउन आग्रह गरेका छन्। इथियोपियाको राजधानी अदिस अबाबामा सुरु भएको अफ्रिकी युनियन (एयू) को ३९ औँ साधारण सत्रलाई सम्बोधन गर्दै उनले सन् २०३५ सम्ममा विकासोन्मुख देशहरूका लागि वार्षिक १.३ ट्रिलियन अमेरिकी डलर वित्तपोषण गर्नुपर्ने आह्वान गरे।
जलवायु परिवर्तनले पृथ्वी र मानिसको जीविकोपार्जनमा विनाशकारी असर पारिरहेको भन्दै उनले यो सङ्कटमा शून्य योगदान रहेको अफ्रिकाले सबैभन्दा बढी मार खेप्नुपरेकोमा चिन्ता व्यक्त गरे।
महासचिव गुटेरेसका अनुसार अफ्रिकाले औसतभन्दा बढी दरमा तापक्रम वृद्धिको सामना गरिरहेको छ। यद्यपि, यो महाद्वीप विश्वकै स्वच्छ ऊर्जाको 'पावरहाउस' बन्न सक्ने प्रचुर सम्भावना उनले औँल्याएका छन्।
विश्वको कुल उत्कृष्ट सौर्य ऊर्जा सम्भावनाको ६० प्रतिशत हिस्सा अफ्रिकामै रहे पनि हाल विश्वव्यापी स्वच्छ ऊर्जा लगानीको मात्र दुई प्रतिशत यस क्षेत्रमा आइरहेको छ। यदि सौर्य ऊर्जा लगायतका नवीकरणीय स्रोतहरूको सही उपयोग हुन सकेमा अफ्रिकाले विश्वकै ऊर्जा सङ्कट समाधानमा नेतृत्वदायी भूमिका खेल्न सक्ने उनको विश्वास छ।
जलवायु न्यायको वकालत गर्दै गुटेरेसले अफ्रिकी राष्ट्रहरूलाई प्रविधि र वित्तमा पहुँच पुर्याउनु विश्व समुदायको दायित्व भएको बताए। उनले विश्वका ठूला प्रदूषक राष्ट्रहरूले आफ्नो ऐतिहासिक जिम्मेवारी बुझ्नुपर्ने र हरितगृह ग्यास उत्सर्जन न्यूनीकरणसँगै गरिब देशहरूलाई अनुकूलनका लागि आवश्यक पर्ने रकम सुनिश्चित गर्नुपर्नेमा जोड दिए।
