कोरियाली संसदले सम्झौता नमानेपछि ट्रम्प आक्रोशित, भन्सार शुल्क २५ प्रतिशत पुर्याउने
हाम्रा कुरा
प्रकाशित २०८२ माघ १३ मंगलबार
2.1k
Shares
काठमाडौँ । अमेरिकी राष्ट्रपति डोनाल्ड ट्रम्पले दक्षिण कोरियाली सामानहरूमा लगाइँदै आएको भन्सार शुल्क १५ प्रतिशतबाट बढाएर पुनः २५ प्रतिशत पुर्याउने घोषणा गरेका छन्। सोमबार सामाजिक सञ्जालमा एक पोस्ट गर्दै उनले दक्षिण कोरियाली व्यवस्थापिकाले दुई देशबीच भएको ऐतिहासिक व्यापार सम्झौतालाई कार्यान्वयन नगरेको आरोप लगाउँदै यो कडा कदम चालेका हुन्।
राष्ट्रपति ट्रम्पका अनुसार दक्षिण कोरियाली सवारी साधन, काठ, औषधि र अन्य पारस्परिक शुल्कहरू अब २५ प्रतिशतको दरमा लाग्नेछन्। उनले सन् २०२५ जुलाई ३० मा दक्षिण कोरियाली राष्ट्रपति ली जे–म्युङसँग एक "उत्कृष्ट सम्झौता" भएको र अक्टोबर २९, २०२५ मा आफू कोरिया भ्रमणमा रहँदा ती सर्तहरू कार्यान्वयन गर्ने प्रतिबद्धता जनाइएको स्मरण गराए। तर, कोरियाली संसदले उक्त सम्झौतालाई अनुमोदन नगरेका कारण आफू भन्सार बढाउन बाध्य भएको उनले तर्क गरे।
गत अक्टोबरमा भएको सम्झौताअनुसार अमेरिकाले दक्षिण कोरियाली सामानमा १० प्रतिशत बिन्दुले भन्सार घटाएर १५ प्रतिशतमा झार्ने र त्यसको बदलामा दक्षिण कोरियाले अमेरिकामा ३५० अर्ब अमेरिकी डलर लगानी गर्ने सहमति भएको थियो। जसमा १५० अर्ब डलर अमेरिकी जहाज निर्माण क्षेत्रमा लगानी गर्ने उल्लेख थियो। तर, दक्षिण कोरियाली संसदमा उक्त सम्झौता अनुमोदन हुन ढिलाइ भएपछि ट्रम्पले पुनः दबाब बढाएका हुन्।
