कांग्रेसको आन्तरिक विद्रोहमा एमाले नेताको 'इन्ट्री'
हाम्रा कुरा
प्रकाशित २०८२ पुष २८ सोमबार
1.5k
Shares
काठमाडौँ । नेकपा (एमाले) का नेता सूर्य थापाले नेपाली कांग्रेसभित्र सभापति शेरबहादुर देउवालाई बाहिर राखेर विशेष महाधिवेशन आयोजना गरिएको भन्दै कटाक्ष गरेका छन् । यता कांग्रेसका महामन्त्रीद्वय गगन थापा र विश्वप्रकाश शर्माको अगुवाइमा सुरु भएको महाधिवेशनमा देउवालाई बारम्बार निमन्त्रणा गर्दा पनि विशेष महाधिवेशनमा सहभागी भएका छैनन् ।
यसैबीच एमाले र त्यसको नेतृत्वलाई लक्षित गरी गरिएका आलोचनाहरूको जवाफ दिँदै थापाको टिप्पणी आएको हो ।
सामाजिक सञ्जाल फेसबुकमार्फत आफ्नो धारणा सार्वजनिक गर्दै नेता थापाले एमालेमा नेतृत्वप्रति सम्मान र आफ्नै प्रकारको उच्च राजनीतिक संस्कार रहेको दाबी गरे । उनले कांग्रेसमा देखिएको नेतृत्व विस्थापनको शैलीलाई पारिवारिक विखण्डनसँग तुलना गर्दै लेखेका छन्, “नेकपा (एमाले)–वृद्ध बालाई अपमानपूर्वक वृद्धाश्रम धपाएर घर–सम्पत्ति कब्जा गरी ढलीमली गर्न चाहने अपसंस्कारी जिउँदो छोराको पार्टी किमार्थ होइन । चेतना भया !”
नेता थापाको यो अभिव्यक्तिलाई विशेष गरी कांग्रेसभित्र संस्थापन पक्ष र इतर पक्षबीच बढेको तीव्र ध्रुवीकरणसँग जोडेर हेरिएको छ । सभापति देउवाले 'अवैधानिक' भन्दै बहिष्कार गरेको विशेष महाधिवेशनमार्फत नेतृत्वलाई दबाब दिने र किनारा लगाउने प्रयास भइरहेको आरोप लागिरहेका बेला एमाले नेता थापाले त्यसलाई 'अपसंस्कारी' कदमको रूपमा व्याख्या गरेका हुन् ।
एउटा दलमा ओली 'बा' को अति सम्मानले नेताहरू भीम रावल बनिरहेका छन् भने अर्को दलमा 'बा' (देउवा) लाई सम्मान नगरेको आरोपमा युवा नेताहरूमाथि कटाक्ष भइरहेको छ।
