मदुरो सत्ताच्युत भएपछि ट्रम्प र मचाडोबीच अर्को हप्ता भेटवार्ता
भेनेजुएलाको भविष्य र नोबेल पुरस्कारको चर्चा
हाम्रा कुरा
प्रकाशित २०८२ पुष २५ शुक्रबार
2k
Shares
काठमाडौँ । भेनेजुएलाकी विपक्षी नेतृ मारिया कोरिना मचाडो र अमेरिकी राष्ट्रपति डोनाल्ड ट्रम्पबीच अर्को साता वासिङ्टनमा हुन लागेको भेटवार्ताअघि 'नोबेल शान्ति पुरस्कार' को विषयले चर्चा पाएको छ। मचाडोले आफ्नो नोबेल शान्ति पुरस्कार ट्रम्पसँग बाँड्ने प्रस्ताव गरेकी छिन् भने ट्रम्पले यसलाई ठूलो सम्मानको रूपमा लिएका छन्।
राष्ट्रपति ट्रम्पले फक्स न्यूजका प्रस्तोता सिन ह्यानिटीसँगको अन्तर्वार्तामा भनेका छन्, “म बुझ्छु कि उहाँ (मचाडो) त्यसो गर्न चाहनुहुन्छ र मलाई आफ्नो पुरस्कार दिन सक्ने संकेत गर्नुभएको छ। त्यो ठूलो सम्मान हुनेछ।”
यद्यपि, ओस्लोस्थित नोबेल इन्स्टिच्युटले भने पुरस्कार हस्तान्तरणको सम्भावनालाई पूर्ण रूपमा नकारेको छ। इन्स्टिच्युटका प्रवक्ता एरिक आसेमले स्पष्ट पारेका छन् कि नोबेल पुरस्कार न खारेज गर्न सकिन्छ, न त अर्को व्यक्तिलाई हस्तान्तरण नै गर्न सकिन्छ। उनले भनेका छन्, "पुरस्कार विजेताले पाएको रकम आफूले चाहेको ठाउँमा खर्च गर्न स्वतन्त्र भए पनि पदवी र निर्णय सदाका लागि लागू हुन्छ।"
यसअघि ट्रम्पले आफूले नोबेल पुरस्कार जित्न नसक्नु नर्वेको कमजोरी भएको र यो उसका लागि ‘ठूलो लज्जा’ भएको टिप्पणी गरेका थिए। नर्वे सरकारले भने नोबेल समितिको निर्णयमा आफ्नो कुनै हस्तक्षेप नहुने स्पष्ट पारेको छ।
मदुरोको पतनपछि पहिलो पटक ट्रम्प र मचाडोको भेट अमेरिकी सेनाले भेनेजुएलाका राष्ट्रपति निकोलस मदुरोलाई सत्ताच्युत गरेको एक हप्तापछि ट्रम्प र मचाडोबीच यो पहिलो बैठक हुन लागेको हो। एक वर्षसम्म भूमिगत रहेकी मचाडो हालै गोप्य रूपमा ओस्लो पुगेकी थिइन् र अर्को हप्ता उनी वासिङ्टन आउने कार्यक्रम छ।
ट्रम्पले भेनेजुएलाको वर्तमान अवस्थाबारे टिप्पणी गर्दै अहिले त्यहाँ तत्काल निर्वाचन गराउने स्थिति नरहेको बताएका छन्। उनले भनेका छन्, "उनीहरूले अहिले चुनाव कसरी गर्ने भन्ने सोच्न पनि सकेका छैनन्, हामीले पहिले देशको पुनर्निर्माण गर्नुपर्छ।" अमेरिकाले भेनेजुएलालाई प्रभावकारी रूपमा नियन्त्रण गर्ने र मचाडोका लागि समर्थन जुटाउने काम गर्ने ट्रम्पको दाबी छ
