काठमाडौँ । नेपाली कांग्रेसको केन्द्रीय कार्यसम्पादन समिति बैठक आज बस्दैछ । बैठक दिउँसो १ बजे केन्द्रीय कार्यालय बीपीनगर सानेपामा बस्नेछ । 

यसअघि शुक्रबार बसेको कार्यसम्पादन समिति बैठकले पार्टीको १५औँ महाधिवेशन आगामी वैशाख २८ देखि ३१ गतेसम्म गर्ने प्रस्ताव पारित गरेको थियो ।

कार्यसम्पादन समितिको उक्त निर्णयसँगै महामन्त्रीद्वय गगनकुमार थापा र विश्वप्रकाश शर्माले यही पुस २७ र २८ गते विशेष महाधिवेशनको तयारी गरेपछि आज फेरि कार्यसम्पादन समिति बैठक बस्न लागेको हो ।

महामन्त्रीद्धयले विधानअनुसार ४० प्रतिशत महाधिवेशन प्रतिनिधिले माग गरेपछि माग गरेको तीन महिनाभित्र विशेष महाधिवेशन गर्नुपर्ने बताउँदै आएका छन् । 

गत असोज २९ गते ५४ प्रतिशत महाधिवेशन प्रतिनिधिले विशेष महाधिवेशन माग गर्दै हस्ताक्षर कार्यवाहक सभापति पूर्णबहादुर खड्कालाई बुझाएका थिए । 

गत शुक्रबार भने माहोल फरक भयो । कार्यसम्पादन समितिको बैठकले विशेष महाधिवेशन लत्याएन मात्र कि नियमित महाधिवेशन पनि बैशाखमा सार्यो । त्यसपछि फरक फरक विचार आए ।

के भन्छन् प्रवक्ता महत ?

शुक्रबार पार्टी केन्द्रीय कार्यालय सानेपामा बसेको कार्यसम्पादन समितिको बैठकले समितिको कार्यकाल जेठसम्म थपेको प्रवक्ता डा. प्रकाशशरण महतले जानकारी दिए । 

यसअघि गत मंसिर १५ गतेको बैठकले माघ मसान्तसम्म केन्द्रीय कार्यसमितिको म्याद थप गरेको थियो । उनले यही पुसमा प्रस्ताव गरेको १५औँ महाधिवेशन विभिन्न समस्याका कारण हुन नसकेको कारण त्यो कार्यतालिका परिमार्जनसहित पारित गरिएको बताए । 

उनका अनुसार बैठकले अगामी २०८३ वैशाख २८, २९, ३० र ३१ गते नियमित महाधिवेशन गर्ने कार्यतालिका बुहमत सदस्यको समर्थनमा पास गरिएको हो । 

उनले भने, ‘बैठकले पार्टीको केन्द्रीय समितिको म्याद अगामी जेठ मसान्तसम्म थपिएको छ । पुसमा प्रस्ताव गरेको १५औँ महाधिवेशन विभिन्न समस्याका कारण हुन नसकेको कारण त्यो कार्यतालिता परिमार्जनसहित पारित गरेका छौँ । बैठकले अगामी २०८३ वैशाख २८, २९, ३० र ३१ गते नियमित महाधिवेशन गर्ने कार्यतालिका पास भएको छ । बिचमा पार्टीको क्रियाशील सदस्यताका टुंग्याउन सम्भव नहुने भएको कारण र आम निर्वाचन पनि अगामी फागुन २१ मा हुने भएको कारण कार्यतालिका परिमार्जन गर्नुभएको हो । यद्यपि केही साथीहरुको फरक मत आएको छ । उहाँहरुले आफ्नो कुरा आफैं राख्नुहोला ।’

के भन्छन् महामन्त्री गगन थापा ?

महामन्त्री गगनकुमार थापाले पार्टीको विधानअनुसार यही पुस मसान्तभित्र विशेष महाधिवेशन हुने दाबी गरेका छन् । पार्टी केन्द्रीय कार्यसम्पादन समितिको बैठकपछि सञ्चारकर्मीसँग गर्दै महामन्त्री थापाले यस्तो बताएका हुन् । 

केन्द्रीय कार्यसमितिले निर्णय गरेर हुने कि विधानअनुसार पार्टी केन्द्रको आह्वानमा हुन्छ भन्ने कुरा दुई–तीन दिनभित्रै टुंगोमा लाग्ने उनको भनाइ थियो । पुसभित्र नियमित महाधिवेशन हुन नसकेको अवस्थामा विशेष महाधिवेशन बोलाउन बाध्यकारी भएकाले शुक्रबारको कार्यसम्पादन समिति बैठकमा आफूले फरक मत राखेको उनको भनाइ छ ।
 
उनले भने, ‘अझै केही दिन प्रतिक्षा गर्छौं, पार्टी सभापति, कार्यवाहक सभापतिज्यूहरुले पार्टी विधानको उल्लङ्घन गर्न पाइँदैन भन्ने कुरा उहाँहरुले बुझ्नुभएको छ । एकदुई दिनभित्र आएर केन्द्रीय कार्यसम्पादन समितिको बैठक राख्नुभयो र विषेश महाधिवेशन बोलाउनुभयो भने पार्टीका लागि सर्वोत्तम कुरा त्यही नै हुन्छ । हामी पनि त्यही चाहन्छौँ । हामी अनुरोध गर्छौं । यदि पार्टीको जिम्मेवार नेताले विधानको पालना गर्नुभएन भने मैले पार्टी महामन्त्री भएर यो कुरा टुलुटुलु हेरेर बस्न मिल्दैन । बस्न सक्दिनँ । विधानको धारा १७ (२) को पालना मैले गर्छु । विशेष महाधिवेशनको आयोजना गर्छौं । यो पुसभित्रमा काठमाडौँमा नेपाली कांग्रेसको विशेष महाधिवेशनको आयोजना हुन्छ । कसले गर्छ भन्ने कुरा एकदुई दिनभित्रमा प्रष्ट हुन्छ । देशभरीका महाधिवेशन प्रतिनिधि साथिहरुलाई अनुरोध गर्न चाहन्छु, तपाई पुस मसान्तमा काठमाडौँमा आउने कुराको लागि औपचारिक निम्तो केही दिनमा आउँछ । काठमाडौंमा भेट हुन्छ ।’

उनले पुस मसान्तभित्र हुने विशेष महाधिवेशनले पार्टीको अगामी नेतृत्व, नीति र कार्यदिशा तय गर्नेसमेत जिकिर गरे । उनले यसअघि नै सभापतिमा उम्मेदवारी घोषणा गरिसकेका छन् । 

आजको बैठक निर्णायक

महामन्त्री थापाले दुई तीन दिन कुर्ने भनेको आजको बैठककै लागि हो । आजको बैठकपछि महामन्त्रीद्धयले निर्णय सार्वजनिक गर्नेछन् । 

उनीहरू विशेष महाधिवेशन गरी नयाँ म्यान्डेटसहित आगामी निर्वाचनमा जानुपर्ने अडानमा छन् । त्यसो गरेमात्र पार्टी स्थायित्वमा रहने उनीहरूको दाबी छ  । 

नेतृत्व भने यसमा तयार छैन । नेतृत्व मतदाताले कांग्रेसलाई बिना एजेन्डा र बिना नेतृत्व परिवर्तन नै विश्वास गर्ने दाबी गर्छ । 

आइतबार बसेको नेतृत्व निकटका नेताहरूको बैठकले विशेष महाधिवेशनलाई औ‍चित्यहीन भनिसकेको छ । नेता कृष्णप्रसाद सिटौलाले अब चुनावको तयारी गर्ने बेलामा विशेष महाधिवेशनको औचित्य नभएको दाबी गरेका हुन् ।

यता विशेष महाधिवेशन पक्षधर भने तरमाराहरू अब केही भागमा नआउने भयो भन्ने चिन्ताका कारण अवैधानिक बाटोमा हिँडेको आरोप लगाएका छन् ।