काठमाडौँ ।  अमेरिकी महान्यायाधिवक्ता पाम बोन्डीले भेनेजुएलाका राष्ट्रपति निकोलस मादुरो पक्राउ परेपछि अब उनले अमेरिकी अदालतहरूमा गम्भीर कानुनी कारबाहीको सामना गर्ने बताएकी छिन्। तेलले धनी दक्षिण अमेरिकी राष्ट्र भेनेजुएलाबाट पक्राउ गरी बाहिर लगिएका मादुरो र उनकी पत्नी सिलिया फ्लोरेस विरुद्ध न्युयोर्कको दक्षिणी जिल्ला अदालतमा औपचारिक अभियोग दर्ता गरिएको छ। 

महान्यायाधिवक्ता बोन्डीले सामाजिक सञ्जालमार्फत जानकारी दिएअनुसार मादुरोमाथि लागुऔषध–आतङ्कवाद षड्यन्त्र, कोकिन आयात गर्ने योजना, मेसिन गन र विनाशकारी उपकरणहरू राखेको तथा तिनलाई संयुक्त राज्य अमेरिका विरुद्ध प्रयोग गर्ने षड्यन्त्र गरेको जस्ता अत्यन्तै गम्भीर आरोपहरू लगाइएको छ।

अमेरिकी रिपब्लिकन सिनेटर माइक लीका अनुसार विदेशमन्त्री मार्को रुबियोले उनलाई फोन गरेर मादुरो पक्राउ परेको र उनीमाथि अमेरिकामा फौजदारी अभियोगमा मुद्दा चलाइने जानकारी दिएका थिए। रुबियोले मादुरो अमेरिकी हिरासतमा रहेकाले अब भेनेजुएलामा थप सैन्य कारबाहीको आवश्यकता नरहेको समेत स्पष्ट पारेका छन्। 

ट्रम्प प्रशासनले यो कारबाही अमेरिकी कर्मचारीहरूलाई वास्तविक वा आसन्न आक्रमणबाट जोगाउन अमेरिकी संविधानको धारा २ अन्तर्गत राष्ट्रपतिको अन्तर्निहित अधिकार क्षेत्रभित्र रहेर गरिएको दाबी गरेको छ। यसअघि अमेरिकी राष्ट्रपति डोनाल्ड ट्रम्पले भेनेजुएलामा अमेरिकी सेनाको ठुलो स्तरको आक्रमणका बीच मादुरो र उनकी पत्नीलाई कब्जामा लिएर देशबाहिर लगिएको घोषणा गरेका थिए।

यता भेनेजुएलाकी उपराष्ट्रपति डेल्सी रोड्रिग्वेजले भने सरकारी टेलिभिजनमार्फत आफ्ना राष्ट्रपति र प्रथम महिलाको अवस्था अज्ञात रहेको बताउँदै ट्रम्प प्रशासनसँग उनीहरू जीवितै रहेको प्रमाण माग गरेकी छिन्। अमेरिकाले लामो समयदेखि क्यारिबियन क्षेत्र र भेनेजुएलाको समुद्री तटमा लागुऔषध तस्करी विरुद्धको अभियानका नाममा सैन्य उपस्थिति बढाउँदै लगेको थियो, जसलाई भेनेजुएलाले काराकासमा सत्ता परिवर्तन गर्ने षड्यन्त्रको रूपमा निन्दा गर्दै आएको थियो। उटाहका सिनेटर लीले ट्रम्प प्रशासनको यस कदमको संवैधानिक आधार र औचित्यमाथि प्रश्न उठाउँदै युद्धको औपचारिक घोषणा वा सैन्य बल प्रयोगको स्पष्ट अधिकार बिना गरिएको यो कारबाहीबारे थप प्रष्ट हुन आफू उत्सुक रहेको बताएका छन्।