पूर्वराष्ट्रपतिका दम्पती विरुद्ध मुद्दा दायर, ७६ जना तानिए
हाम्रा कुरा
प्रकाशित २०८२ पुष १५ मंगलबार
1.8k
Shares
काठमाडौँ । दक्षिण कोरियाको विशेष काउन्सिलले महाभियोग लगाइएका पूर्वराष्ट्रपति युन सुक-योल र उनकी पत्नी किम क्योन-ही विरुद्धको भ्रष्टाचार अनुसन्धान प्रतिवेदन सार्वजनिक गर्दै मुद्दा दायर गरेको छ।
स्वतन्त्र काउन्सिल मिन जुङ-कीको नेतृत्वमा रहेको टोलीले १८० दिन लामो अनुसन्धान पूरा गरी २० जना हिरासतमा रहेका व्यक्तिसहित कुल ७६ जना विरुद्ध मुद्दा चलाएको हो।
विशेष काउन्सिलका अनुसार पूर्वराष्ट्रपति युन र उनकी पत्नी किम विरुद्ध शेयर मूल्यमा चलखेल, विलासी उपहार स्वीकार गरेको, राष्ट्रपतीय कार्यालय स्थानान्तरणमा अवैध हस्तक्षेप गरेको र अवैध राजनीतिक कोष सङ्कलन गरेको जस्ता गम्भीर आरोपहरू छन्।
टोलीले किमले प्रथम महिलाको पद दुरुपयोग गरी नियुक्ति र मनोनयनमा व्यापक हस्तक्षेप गरेको पुष्टि गर्दै यसलाई 'आधुनिक समयको सार्वजनिक पदको बिक्री' को संज्ञा दिएको छ।
गत अगस्टदेखि हिरासतमा रहेकी किम क्योन-ही विरुद्ध विशेष काउन्सिलले १५ वर्षको जेल सजाय माग गरेको छ। किम हिरासतमा रहेर मुद्दा चलाइने दक्षिण कोरियाली इतिहासकै पहिलो 'प्रथम महिला' बनेकी छिन्। यस मुद्दाको अन्तिम फैसला आगामी वर्षको जनवरी २८ का लागि तय गरिएको छ।
