देशभर पश्चिमी वायुको प्रभाव: तराईमा बाक्लो हुस्सु र कुहिरो
हाम्रा कुरा
प्रकाशित २०८२ पुष ११ शुक्रबार
741
Shares
काठमाडौँ । हाल देशभर पश्चिमी वायुको आंशिक प्रभाव रहेकाले तराईसहित देशका विभिन्न भू-भागको मौसममा बदलाब आएको छ। मौसम पूर्वानुमान महाशाखाका अनुसार अहिले तराई, कोशी र मधेश प्रदेशमा आंशिक बदली हुनुका साथै तराईका धेरै स्थानहरूमा बाक्लो हुस्सु लागेको छ।
दिउँसो र रातिको मौसमको अवस्था आज दिउँसो तराईका धेरै स्थानहरूमा हुस्सु रहने सम्भावना छ। विशेषगरी कोशी, मधेश र बागमती प्रदेशका तराई क्षेत्रमा बिहान केही समय र बाँकी तराईका भू-भागमा मध्याह्नसम्म कुहिरो लाग्ने महाशाखाले जनाएको छ। गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा भने आंशिक बदली रहनेछ।
आज राति पनि तराईका धेरै ठाउँमा हुस्सु लाग्ने क्रम जारी रहनेछ। लुम्बिनी, कर्णाली र सुदूरपश्चिम लगायत पहाडी तथा हिमाली क्षेत्रको मौसम आंशिक बदली रहने पूर्वानुमान गरिएको छ।
यातायात र स्वास्थ्यमा सावधानी अपनाउन आग्रह तराईमा लाग्ने बाक्लो हुस्सु र कुहिरोका कारण पारदर्शिता कम हुने भएकाले सडक तथा हवाई यातायातमा बिहानको समयमा आंशिक प्रभाव पर्न सक्ने देखिएको छ। महाशाखाले चिसो र हुस्सुका कारण दैनिक जनजीवन र स्वास्थ्यमा पर्न सक्ने असरबाट जोगिन आवश्यक सतर्कता अपनाउन सबैमा आग्रह गरेको छ।
