बाजुरा । बाजुराको गौमुल गाउँपालिकाले पालिकाभित्रका नागरिकहरूको सहजताका लागि आज बिहीबारदेखि आयोडिनयुक्त 'भानु नुन' वितरण सुरु गरेको छ। स्थानीयलाई दैनिक उपभोग्य वस्तुको अभाव नहोस् भन्ने उद्देश्यले गाउँपालिकाले सबै वडाहरूमा प्रति परिवार २२ केजीका दरले नुन वितरण गर्ने व्यवस्था मिलाएको हो।
गाउँपालिका अध्यक्ष हरिबहादुर रोकायाका अनुसार नुन प्राप्त गर्नका लागि सेवाग्राहीले आफ्नो नेपाली नागरिकताको फोटोकपी अनिवार्य रूपमा साथमा लिएर आउनुपर्नेछ। वडा नम्बर ३, ४, ५ र ६ का बासिन्दाहरूले गाउँपालिकाको केन्द्र घट्मुनाबाट नुन लिन सक्नेछन् भने वडा नम्बर १ र २ का नागरिकहरूका लागि सिम बजारबाट नुन वितरण गर्ने प्रबन्ध मिलाइएको छ।
पालिकाले भिडभाड कम गर्न र व्यवस्थापन सहज बनाउन वडागत रूपमा समय तालिका समेत सार्वजनिक गरेको छ। जसअनुसार आज पुस १० गते वडा नम्बर ४ र ५, भोलि पुस ११ गते वडा नम्बर ३ र ६ तथा पुस १२ गते वडा नम्बर १ र २ का स्थानीयलाई नुन वितरण गरिनेछ। दुर्गम क्षेत्रका नागरिकलाई सस्तो र सुलभ मूल्यमा आयोडिनयुक्त नुन उपलब्ध गराउने पालिकाको यस कार्यले स्थानीय बासिन्दालाई राहत पुग्ने विश्वास गरिएको छ।
