मधेस प्रदेशको सभामुखमा यादव निर्वाचित, पक्षमा ७२ मत
हाम्रा कुरा
प्रकाशित २०८२ पुष ६ आइतबार
810
Shares
काठमाडौँ | मधेस प्रदेशको सभामुख पदमा प्रदेशसभा सदस्य रामअशिष यादव निर्वाचित भएका छन्। आइतबार प्रदेशसभामा भएको मत विभाजन प्रक्रियामार्फत यादव सभामुख पदमा चुनिएका हुन्।
निर्वाचनका क्रममा प्रदेशसभामा उपस्थित कुल ९६ सदस्यहरूमध्ये यादवको पक्षमा ७२ मत परेको थियो। उनको विपक्षमा भने २४ मत मात्र खसेको थियो। यादवलाई नेपाली कांग्रेस, जसपा नेपाल, जनमत पार्टी, नेकपा (माओवादी केन्द्र), नेकपा (एकीकृत समाजवादी), लोसपा र नागरिक उन्मुक्ति पार्टीले समर्थन गरेका थिए।
अर्कोतर्फ, नेकपा एमाले, राप्रपा र नेपाल संघीय समाजवादी पार्टीले भने उनको विपक्षमा मतदान गरेका थिए। यादवको पक्षमा स्पष्ट बहुमत पुगेकाले सभामुख पदका अर्का उम्मेदवार त्रिलोकी प्रसादको प्रस्तावमाथि भने मतदान गर्नै परेन।
प्रदेशसभाको यो नयाँ चयनसँगै मधेस प्रदेशले नयाँ नेतृत्व पाएको छ, जसले अब प्रदेशसभाको आगामी बैठकहरूको अध्यक्षता गर्नेछ।
