इतिहासकै ठूलो जलसेनाको घेराबन्दीमा भेनेजुएला, तेल ट्याङ्करमाथि ट्रम्पको पूर्ण नाकाबन्दी
ट्रम्पद्वारा 'स्थल आक्रमण' को चेतावनी
हाम्रा कुरा
प्रकाशित २०८२ पुष ३ बिहिबार
1.8k
Shares
काठमाडौँ । अमेरिकी राष्ट्रपति डोनाल्ड ट्रम्पले भेनेजुएलाका सबै प्रतिबन्धित तेल ट्याङ्करहरूमाथि पूर्ण नाकाबन्दीको आदेश जारी गर्दै राष्ट्रपति निकोलास मादुरोमाथि चलिरहेको दबाब अभियानलाई थप तीव्र बनाएका छन्।
ट्रम्पले भेनेजुएलाको सरकारलाई “विदेशी आतङ्कवादी सङ्गठन” को रूपमा नामकरण गर्दै उनीहरूमाथि आतङ्कवाद, लागुऔषध तस्करी र मानव तस्करी जस्ता गम्भीर अपराधमा संलग्न भएको आरोप लगाएका छन्।
अमेरिकाले आफ्नो तेल, जमिन वा अन्य सम्पत्ति कुनै पनि शत्रु शासनलाई लिन अनुमति नदिने बताउँदै ट्रम्पले भेनेजुएलाले अमेरिकाबाट “चोरेका” सबै सम्पत्ति तुरुन्त फिर्ता गर्नुपर्ने माग राखेका छन्।
ट्रम्पका अनुसार भेनेजुएला अहिले दक्षिण अमेरिकाको इतिहासकै सबैभन्दा ठूलो जलसेनाको घेराबन्दीमा रहेको छ र सम्पत्ति फिर्ता नगरेसम्म यो दबाब जारी रहने चेतावनी दिइएको छ। यसै सिलसिलामा गत हप्ता अमेरिकी प्रशासनले भेनेजुएलाको तट नजिकै एउटा तेल ट्याङ्कर कब्जामा लिएको थियो।
साथै मादुरोकी पत्नीका तीन भतिजा, उनीसँग सम्बद्ध एक व्यवसायी र तेल ढुवानीमा संलग्न ६ वटा कम्पनीहरूमाथि नयाँ प्रतिबन्धहरू समेत लगाइएको छ।
सेप्टेम्बरको सुरुदेखि अमेरिकी सेनाले क्यारिबियन र पूर्वी प्यासिफिक क्षेत्रमा लागुऔषध ढुवानी गरेको आरोपमा कम्तीमा २५ वटा जहाजहरू डुबाएका छन्, जसमा परी कम्तीमा ९५ जनाको ज्यान गएको छ।
झन्डै चार महिनादेखि क्यारिबियन क्षेत्रमा अमेरिकाले ठूलो सैन्य उपस्थिति कायम राखेको छ, जसलाई वासिङ्टनले लागुऔषध विरुद्धको अभियान भनेको छ। तर भेनेजुएलाले भने यसलाई राजधानी काराकासमा सत्ता परिवर्तन गर्ने बहाना मात्र भएको दाबी गरेको छ। पछिल्ला हप्ताहरूमा ट्रम्पले क्यारिबियन क्षेत्रका लागुऔषध तस्करहरूमाथि “छिट्टै” स्थल आक्रमण सुरु गर्ने सङ्केत समेत दिएका छन्।
