‘युक्रेनको नेटो सदस्यता’ मस्को वार्ताको प्रमुख समस्या, क्रेमलिनको निराशा
हाम्रा कुरा
प्रकाशित २०८२ मंसिर १८ बिहिबार
1.9k
Shares
काठमाडौँ । अमेरिकी प्रतिनिधिहरूसँगको वार्तामा कुनै ठोस प्रगति नदेखिएको भन्दै क्रेमलिनले बुधबार मस्कोमा भएको अमेरिका–रुस वार्तामा युक्रेनको नेटो सदस्यता ‘प्रमुख समस्या’ बनेको बताएको छ। चार वर्ष लामो युद्ध अन्त्य गर्ने अमेरिका नेतृत्वको प्रयासमा नेटो गठबन्धनको सदस्यता एउटा प्रमुख बाधा बनेको छ। अमेरिकी राष्ट्रपति डोनाल्ड ट्रम्पले युद्ध पदमा फर्किएको एक दिनभित्र समाधान गर्ने वाचा गरेका थिए।
किएभले नेटोको सदस्यतालाई भविष्यको रूसी आक्रमण विरुद्धको सुरक्षा कवच को रूपमा हेर्छ, जबकि रूसी राष्ट्रपति भ्लादिमिर पुटिनले युक्रेनमा सेना पठाउनुको कारणहरूमध्ये एकको रूपमा नेटोको विस्तारलाई उल्लेख गरेका थिए।
शीर्ष क्रेमलिन सहयोगी युरी उशाकोभले यो विषय रूसी नेता पुटिन, अमेरिकी दूत स्टिभ विट्कोफ र ट्रम्पका ज्वाइँ जारेड कुश्नरबीच छलफलको 'मुख्य प्रश्नहरू मध्ये एक' रहेको पुष्टि गरे। उशाकोभले 'अमेरिकी साझेदारहरूले हाम्रा विचार र मुख्य प्रस्तावहरूलाई ध्यानमा राख्न आफ्नो तत्परता पुष्टि गरेको' जानकारी दिए।
ट्रम्पले बारम्बार युक्रेनको नेटो सदस्यताको प्रस्तावलाई अस्वीकार गरेका छन्। उनको पछिल्लो २८–बुँदे योजना, जसलाई आलोचकहरूले रुसको इच्छा–सूची भनेका थिए, मा 'किएभलाई गठबन्धनमा कहिल्यै प्रवेश दिइने छैन' भनी स्पष्ट उल्लेख गरिएको थियो। युक्रेन र युरोपद्वारा उक्त योजनालाई संशोधन गरिएको थियो तर मङ्गलबारको बैठकमा मस्कोले यसलाई अस्वीकार गरेको छ।
नेटो प्रमुख मार्क रुट्टले बुधबार किएभको सदस्यताका लागि ढोका खुला रहेको, तर हाल युक्रेन नेटोमा सामेल हुनेबारे कुनै सहमति नभएको बताएका छन्। नेटोका परराष्ट्र मन्त्रीहरूले बुधबार ब्रसेल्समा हुने बैठकमा लडाइँ रोक्न अमेरिकाले गरेको पहलका बारेमा छलफल गर्ने योजना तय गरेका थिए तर अमेरिकी विदेश मन्त्री मार्को रुबियो उक्त भेलामा सहभागी नहुने बताइएको छ।
