काठमाडौँ । भारतको बिहार विधानसभा चुनावको मतगणना भइरहेको छ । बिहारमा २४३ सिटका लागि दुई चरणमा चुनाव भएको थियो । मतगणना आज बिहानबाट शुरू भएको हो । 

प्रारम्भिक नतिजाअनुसार भारतीय जनता पार्टी भाजपाको एनडीए गठबन्धन अगाडि रहेको छ । अहिलेसम्म कुनै पनि सिटको अन्तिम परिणाम नआएको भए पनि प्रारम्भिक मतगणनाले एनडीएलाई स्पष्ट बहुमत दिलाएको छ । 

२४३ सिटको मतगणना भइरहँदा एनडीए १५३ सिटमा अगाडि छ । कांग्रेस सम्मिलित महागठबन्धन जम्मा ७८ सिटमा अगाडि देखिएको छ । जबकि बहुमतका लागि १२२ सिट जित्नुपर्ने हुन्छ ।  

महागठबन्धन भन्दा एनडीए दोब्बर बढीले अगाडि रहेको छ । 

एक्जिट पोलले पनि जिताएको थियो एनडीए गठबन्धनलाई

अन्तिम चरणको मतदान सकिएलगत्तै मङ्गलबार साँझ सार्वजनिक भएका एक्जिट पोलहरूले एनडीए गठबन्धनलाई स्पष्ट बहुमत दिने अनुमान गरेका थिए । 

सत्रवटा एजेन्सीहरूको सर्वेक्षणको औसत अनुमानअनुसार २४३ सिट भएको बिहार विधानसभामा एनडीएले १५४ सिट जित्ने प्रक्षेपण गरिएको छ। यो अनुमान गत चुनाव (१२५ सिट) भन्दा करिब २९ सिट बढी हो। महागठबन्धनले ८३ सिट जित्ने अनुमान गरिएको छ । जुन गत चुनाव (११० सिट) भन्दा २७ सिट कम हो, भने अन्यले ५ सिट गुमाउन सक्ने अनुमान छ। व्यक्तिगत पार्टीहरूमध्ये, भाजपाले अधिकतम ७५ सिट र कांग्रेसले १३ सिट जित्ने अनुमान गरिएको छ। पहिलो पटक चुनाव लडेको प्रशान्त किशोरको जन सुरज पार्टीले भने ३ देखि ५ सिट जित्ने अनुमान छ।

यता भारतीय सञ्चारमाध्यम दैनिक भास्करको एक्जिट पोलले पनि एनडीएको लागि स्पष्ट बहुमतको प्रक्षेपण गरेको छ। भास्करले एनडीएले १४५ देखि १६० सिट जित्ने अनुमान गरेको छ, जबकि महागठबन्धनले ७३ देखि ९१ सिट जित्ने अनुमान गरिएको छ। यस सर्वेक्षणअनुसार, भाजपाले ७२-८२ सिट र जेडीयूले ५९-६८ सिट जित्ने अनुमान गरिएको छ।

बिहारमा पछिल्ला तीन विधानसभा चुनाव (२०१०, २०१५ र २०२०) को एक्जिट पोल ट्रेन्डले सर्वेक्षण एजेन्सीहरू मतदाताको भावना मापन गर्नमा लगातार असफल भएको देखाउँछ। सन् २०१५ मा, धेरैजसो एक्जिट पोलहरूले एनडीए (बीजेपी+) को लागि अग्रता भविष्यवाणी गरेका थिए, जबकि अन्तिम परिणामले महागठबन्धन (आरजेडी-जेडीयू-कांग्रेस) ले स्पष्ट बहुमत प्राप्त गरेको देखाएको थियो।

सन् २०२० मा परिस्थिति उल्टो भयो, जब धेरै एजेन्सीहरूले महागठबन्धनको जितको भविष्यवाणी गरे पनि परिणाममा एनडीएले १२५ सिट जितेर सरकार बनाएको थियो। यसको अर्थ धेरैजसो पोलहरू फेरि गलत साबित भएका थिए।