पहिलो त्रैमासमा छिमेकी दुई राष्ट्रसँग मात्रै तीन खर्ब बढीको व्यापार घाटा
हाम्रा कुरा
प्रकाशित २०८२ कार्तिक १० सोमबार
1.2k
Shares
काठमाडौं । चालु आर्थिक वर्षको पहिलो त्रैमासिक (साउन–असोज) मा नेपालले छिमेकी दुई राष्ट्र भारत र चीनसँग मात्रै ३ खर्ब ४ अर्ब ४५ करोड रुपैयाँभन्दा बढीको विशाल व्यापार घाटा व्यहोर्नुपरेको छ। निर्यातभन्दा आयात चुलिँदा नेपालको व्यापार सन्तुलनमा गम्भीर असन्तुलन देखिएको हो।
भन्सार विभागका अनुसार, यो अवधिमा भारतबाट नेपालले २ खर्ब ५८ अर्ब ८७ करोड रुपैयाँको वस्तु आयात गरेको छ भने निकासी ५९ अर्ब १२ करोड रुपैयाँको मात्रै गरेको छ। यसबाट पहिलो त्रैमासमा भारतसँग मात्र नेपालले १ खर्ब ९९ अर्ब ७४ करोड रुपैयाँको व्यापार घाटा व्यहोर्नुपरेको छ।
त्यस्तै, उत्तरी छिमेकी चीनसँग पनि व्यापार घाटाको अवस्था विकराल छ। नेपालले चीनबाट १ खर्ब ४८ अर्ब ९४ करोड रुपैयाँको वस्तु आयात गरेको छ, तर निर्यात १८ करोड ६४ लाख रुपैयाँमा सीमित छ। यसबाट नेपालले चीनसँग १ खर्ब ४८ अर्ब ७५ करोड रुपैयाँभन्दा बढीको व्यापार घाटा व्यहोरेको छ (जुन तथ्याङ्कमा १ खर्ब ४ अर्बभन्दा बढी उल्लेख छ)।
भारतपछि नेपालले सबैभन्दा बढी व्यापार घाटा व्यहोर्ने मुलुकमा चीन नै पर्ने गरेको छ। यी दुई देशबाहेक नेपालले अफगानिस्तान, अर्जेन्टिना, अस्ट्रेलिया, बङ्गलादेशदेखि अमेरिकी मुलुकहरूसँग पनि ठूलो व्यापार घाटा व्यहोरेको छ। नेपालले कुल १४० देशसँग वैदेशिक व्यापार गर्दै आएकोमा साइप्रस र बहामासलगायतका केही सीमित देशहरूसँग भने वैदेशिक व्यापार नाफामा रहेको विभागको तथ्याङ्कले देखाएको छ।
