'अक्षयको प्रशंसा, शाहरुख बोरिङ': नसिरुद्दिनको पुरानो बयानले सामाजिक सञ्जालमा तहल्का
हाम्रा कुरा
प्रकाशित २०८२ कार्तिक ७ शुक्रबार
1.5k
Shares
काठमाडौँ। बलिउडका अनुभवी अभिनेता नसिरुद्दीन शाहको एक पुरानो अन्तर्वार्ताको अंश सामाजिक सञ्जालमा भाइरल भइरहेको छ । जसमा उनले दुई ठूला अभिनेतामध्ये अक्षय कुमारको खुलेर प्रशंसा गरेका छन् भने शाहरुख खानलाई भने 'बोरिङ अभिनेता' भनेर टिप्पणी गरेका छन्।
अन्तर्वार्तामा नसिरुद्दीन शाहलाई अक्षय कुमार र शाहरुख खान (कुमार र खान) जस्ता अभिनेताहरूको अभिनय मन पर्छ कि पर्दैन भनेर सोधिएको थियो। जवाफमा उनले आफू खासै फिल्म नहेर्ने र धेरैले आफूलाई प्रभावित पार्न नसकेको बताए।
यद्यपि, उनले अक्षय कुमारको प्रशंसा गर्दै भने, "अक्षय कुमार एक अभिनेता हुन् जसको म साँच्चै प्रशंसा गर्छु। उनले कुनै गडफादर वा मद्दत बिना नै आफ्नो पहिचान बनाएका छन्। मैले धेरै समयअघि उनीसँग काम गरेको थिएँ, र अब उनको अभिनयमा ठूलो सुधार देखिँदैछ र उनी एक राम्रो अभिनेता बनेका छन्।" शाहले अक्षयसँग 'मोहरा' जस्ता फिल्ममा काम गरेका छन्।
तर, जब नसिरुद्दीन शाहलाई शाहरुख खानले पनि गडफादर बिना नै आफ्नो पहिचान बनाएका हुन् भनेर सोधियो, उनले स्वीकार्दै भने, "म सहमत छु, तर एक अभिनेताको रूपमा, उनी बोरिङ छन्।"
शाहले शाहरुख खानसँग 'चमत्कार' (जहाँ उनले भटकिरहेको आत्माको भूमिका खेलेका थिए), 'कभी हाँ कभी ना' र 'मै हूँ ना' जस्ता चर्चित फिल्महरूमा काम गरेका छन्। 'मै हूँ ना' मा नसिरुद्दीन शाहले ब्रिगेडियर शेखर शर्मा र शाहरुख खानले उनका छोरा मेजर रामप्रसाद शर्माको भूमिका निभाएका थिए।
