काठमाडौँ अमेरिकी राष्ट्रपति डोनाल्ड ट्रम्पले बुधबार भेनेजुएलाविरुद्ध गोप्य रूपमा केन्द्रीय गुप्तचर एजेन्सी (सीआईए) लाई कारबाही गर्न अनुमति दिएको सङ्केत गर्दै दक्षिण अमेरिकी यस राष्ट्रमा भूमिगत रूपमा रहेका कथित ड्रग कार्टेलहरू विरुद्ध स्थलीय आक्रमण (जमिनमा सैन्य कारबाही) गर्ने विकल्पबारे पनि विचार भइरहेको बताएका छन्।

राष्ट्रपति ट्रम्पको उक्त टिप्पणीपछि भेनेजुएलाका वामपन्थी नेता निकोलस मदुरोले तीव्र प्रतिक्रिया जनाउँदै ‘सीआईएले गराएको कू’ को घोर निन्दा गरे र क्यारिबियन क्षेत्रमा अमेरिकी नौसैनिक आक्रमणपछि आफ्ना सेनालाई व्यापक सैन्य अभ्यासको आदेश दिए।

न्युयोर्क टाइम्सले मदुरोविरुद्ध सीआईएलाई गुप्त कारबाहीको स्वीकृति दिएको समाचार प्रकाशित गरेपछि विस्तृत प्रश्न सोधिँदा ट्रम्पले 'मैले वास्तवमा दुई कारणले अनुमति दिएँ' भन्दै मदुरोको सरकारलाई 'नार्को–आतङ्कवादी शासन' को संज्ञा दिए। उनले मदुरोलाई ड्रग कार्टेलको नेतृत्व गरेको आरोप लगाउँदै भेनेजुएलाका कथित लागुऔषध कार्टेलहरू विरुद्ध समुद्रमा भएका घातक नौसैनिक कारबाहीपछि भूमिमा पनि सैन्य अभियान विस्तार गर्ने सम्भावनाबारे विचार भइरहेको जानकारी दिए। ट्रम्पले ओभल अफिसमा पत्रकारहरूसँग भने, "हामी अहिले भूमिगत विकल्प हेर्दैछौँ किनभने समुद्रमा त हामीले राम्रो नियन्त्रण पाइसकेका छौँ।"

हालै क्यारिबियनमा अमेरिकी डुङ्गामाथि भएको आक्रमणमा कम्तीमा २७ जनाको मृत्यु भएको बताइएको छ। मदुरोले मङ्गलबार सोही कथित लागुऔषध डुङ्गा आक्रमणपछि देशका ठूला सहरहरूमा व्यापक सैन्य अभ्यासको आदेश दिएका थिए। मदुरोको निर्देशनमा भेनेजुएलाको सम्पूर्ण एटलान्टिक–क्यारिबियन तटमा अभ्यास सञ्चालन गरियो। उनले भेनेजुएलाका ‘पहाड, तट, विद्यालय, अस्पताल, कारखाना र बजार’ को सुरक्षा सुनिश्चित गर्न सेना, प्रहरी र नागरिक मिलिसियालाई परिचालन गरिएको उल्लेख गरे।

वासिङ्टनले क्यारिबियन क्षेत्रमा आफ्नो नौसैनिक उपस्थितिलाई लागुऔषध विरोधी अभियानको हिस्सा भएको दाबी गरे पनि ल्याटिन अमेरिकाका धेरै देशले यसलाई भेनेजुएलामा शासन परिवर्तनको प्रयास को रूपमा व्याख्या गरेका छन्। यस आक्रमणमा कोलम्बियाली नागरिकहरू मारिएको विश्वास गर्दै कोलम्बियाका राष्ट्रपति गुस्ताभो पेट्रोले संयुक्त राष्ट्रसङ्घलाई ट्रम्पविरुद्ध ‘आपराधिक प्रक्रिया’ सुरु गर्न आह्वान गरेका छन्।