काठमाडौँ। गाजा र इजिप्टबीचको महत्त्वपूर्ण मानवीय सहायता मार्ग राफा सीमा नाका इजरायलले बुधवार पुनः बन्द गरेको छ। इजरायलले हमासलाई आफ्नो नियन्त्रणमा रहेका अन्तिम मृतक बन्धकहरूको अवशेष तत्काल हस्तान्तरण गर्न आग्रह गर्दै नाका बन्द गरेको हो।

इजरायली सार्वजनिक प्रसारक (कान) ले सीमा पार विन्दु पुनः खुल्ने जानकारी दिए पनि बुधवार अवेरसम्म नाका खुल्न सकेन, यसबारे इजरायली सरकारका प्रवक्ताले कुनै प्रतिक्रिया दिन चाहेनन्।

संयुक्त राष्ट्रसङ्घका मानवीय सहायता प्रमुख टम फ्लेचरले अमेरिकी राष्ट्रपति डोनाल्ड ट्रम्पको मध्यस्थतामा भएको युद्धविरामले ध्वस्त प्यालेस्टाइन क्षेत्रमा आवश्यक राहतका लागि सहयोग गर्न नसकेकोमा निराशा व्यक्त गरे। फ्लेचरले हमासले बन्धकका सबै शव तत्काल फिर्ता गर्न सहमति जनाएको बताए पनि गाजामा हमासबाट भएको नागरिकहरूविरुद्धको हिंसाले आफू गम्भीर रूपमा चिन्तित रहेको बताए। उनले इजरायलले हप्तामा हजारौं ट्रकहरू पुग्ने गरी मानवीय सहायताको व्यापक वृद्धि गर्न अनुमति दिनुपर्ने माग गरे। "अहिले धेरै मानिसहरूको जीवन सहायतामा निर्भर छ र यसमा विश्वले जोड दिएको छ। हामीलाई थप खुला नाका चाहिन्छ," उनले थपे।

ट्रम्प योजना अन्तर्गत भएको युद्धविराम सम्झौतामा हमासले बन्धक बनाएका अन्तिम २० जीवित बन्धकहरू मुक्त भइसकेका छन् भने बदलामा लगभग दुई हजार प्यालेस्टिनी कैदीहरू रिहा भएका छन्। यस सम्झौताले लडाइँ र बमबारीमा रोक लगाएको छ।

तर, मृतकको अवशेष आदानप्रदानमा अवरोध आएको छ। हमासले अहिलेसम्म आठ शव फिर्ता गरे पनि त्यसमध्ये सातको मात्र पहिचान भएको छ। आठौँ शव पूर्व बन्धकको नभएको इजरायली सेनाले बताएपछि केही इजरायली राजनीतिज्ञहरूले हमासलाई सम्झौता तोडेको आरोप लगाएका छन्। बाँकी २० जनाको अवशेष गाजामै रहेको र प्रधानमन्त्री बेन्जामिन नेतान्याहूलाई शवहरूलाई स्वदेश ल्याउन घरेलु दबाब बढेको छ।

इजरायलका अति दक्षिणपन्थी राष्ट्रिय सुरक्षा मन्त्री इतामार बेन गिभरले हमासले सैनिकको अवशेष फिर्ता नगरेमा सहायता आपूर्ति बन्द गर्ने चेतावनी दिएका छन्। यसैबीच, इजरायलले आफ्नो हिरासतमा रहेका थप ४५ प्यालेस्टिनी शवहरू दक्षिणी गाजाको नासिर अस्पतालमा स्थानान्तरण गरेको छ। हमास नियन्त्रित गाजाका स्वास्थ्य मन्त्रालयका अनुसार ट्रम्पको योजना अन्तर्गत अहिलेसम्म ९० जनाको अवशेष फिर्ता भइसकेको छ। सम्झौताअनुसार इजरायलले प्रत्येक मृतक इजरायलीका लागि १५ प्यालेस्टिनीको मृत शरीर फिर्ता गर्नेछ।