गाजा युद्ध : इजिप्टमा आज अन्तर्राष्ट्रिय शिखर सम्मेलन, ट्रम्प र सिसीले गर्ने संयुक्त अध्यक्षता
हाम्रा कुरा
प्रकाशित २०८२ असोज २७ सोमबार
2.3k
Shares
काठमाडौँ। इजिप्टको रातो सागरको रिसोर्ट शहर शर्म अल–शेखमा आज (सोमबार) अन्तर्राष्ट्रिय शिखर सम्मेलन आयोजना हुँदैछ। इजिप्टको राष्ट्रपति कार्यालयले शनिबार यसबारे घोषणा गरेको हो।
इजिप्टका राष्ट्रपति अब्देल फताह अल–सिसी र अमेरिकी राष्ट्रपति डोनाल्ड ट्रम्पले संयुक्त रूपमा अध्यक्षता गर्ने यस बैठकमा २० भन्दा बढी देशका नेताहरूको सहभागिता रहने बताइएको छ। विज्ञप्तिअनुसार शिखर सम्मेलनले गाजा पट्टीमा युद्ध अन्त्य गर्ने, मध्यपूर्वमा शान्ति र स्थायित्व ल्याउने प्रयास बढाउने र क्षेत्रीय सुरक्षा र स्थिरताको नयाँ चरणको सुरुवात गर्ने लक्ष्य राखेको छ।
यो सम्मेलन इजरायल र हमास बीचको युद्धविराम सम्झौता शुक्रवारदेखि लागू भएको पृष्ठभूमिमा हुन लागेको हो, जुन इजिप्ट, कतार, टर्की र संयुक्त राज्य अमेरिकाको मध्यस्थतामा शर्म अल शेखमा तीन दिनको गहन वार्तापछि भएको थियो।
युद्धविराम योजनाको पहिलो चरणमा गाजा शहर, रफाह, खान युनिस र उत्तरबाट इजरायली सेना फिर्ता, सहायताका लागि पाँचवटा क्रसिङ खोल्ने र बन्धक तथा बन्दीहरूको रिहाइ समावेश छ। हमासको एक स्रोतले शुक्रवार गाजा र इजिप्ट बीचको रफाह क्रसिङ अर्को हप्ताको मध्यमा मानिसहरूको सीमित आवागमनलाई अनुमति दिन पुनः खोल्ने अपेक्षा गरिएको बताएको छ।
गाजाका स्वास्थ्य अधिकारीहरूका अनुसार, दुई वर्षभन्दा बढी समयदेखि चलिरहेको इजरायली सैन्य कारबाहीले गाजालाई तहसनहस पारेको छ, जहाँ ६७ हजारभन्दा बढी मानिसहरूको मृत्यु भएको र अनिकाल परेको छ।
