बालेन र सुदनविरुद्धको जाहेरी दर्ता नगरेको प्रहरीले आज साँझसम्म जवाफ दिने [तस्बिर]
हाम्रा कुरा
प्रकाशित २०८२ असोज २२ बुधबार
1.2k
Shares
काठमाडौँ । काठमाडौँ महानगरपालिका मेयर वालेन्द्र साह (बालेन) र हामी नेपाली संस्थाका अध्यक्ष तथा जेन–जी आन्दोलनका अगुवा सुदन गुरुङविरुद्धको जाहेरी दर्ता गर्न नमानेको प्रहरीले आज साँझसम्म जवाफ दिने भएको छ ।
मंगलबार एमालेको विद्यार्थी संगठन अनेरास्ववियुले जिल्ला प्रहरी परिसर काठमाडौँमा बालेन र सुदनविरुद्ध जाहेरी दिएको थियो । उक्त जाहेरी दर्ता नगरे पनि २४ घण्टाभित्र जवाफ दिने बताएको अनेरास्ववियुका पूर्वअध्यक्ष समिक बडालले बताएका छन् ।
बडालले प्रहरीले सरकारी वकिलको राय लिएर २४ घण्टाभित्र जवाफ दिने बताएको जानकारी दिए । गत भदौ २३ र २४ गतेको आन्दोलनको विषयलाई लिएर जाहेरी दिएको अनेरास्ववियुले जनाएको छ ।
आन्दोलनमा व्यक्ति हत्या, आन्दोलनलाई उक्साउने काम, राष्ट्रिय सम्पत्ति जलाउने र तोडफोड गर्न उक्साउने, नेपाली नागरिक भएर विदेशीलाई जासुसी गर्नेविरुद्ध जाहेरी दिएको अनेरास्वविकयुले भनेको छ ।
