काठमाडौँ। अमेरिकी राष्ट्रपति डोनाल्ड ट्रम्पको दबाब र कडा अध्यागमन नीतिहरू का कारण संयुक्त राज्य अमेरिकाले अगस्ट महिनामा विद्यार्थी भिसा जारी गर्ने दरमा झन्डै पाँच भागको एक भागले कमी आएको छ।

अन्तर्राष्ट्रिय व्यापार प्रशासनका अनुसार, अमेरिकाले अगस्टमा जम्मा ३ लाख १३ हजार १३८ विद्यार्थी भिसा मात्र जारी गरेको छ, जुन सन् २०२४ को अगस्टको तुलनामा १९.१ प्रतिशतले कम हो। अगस्ट महिना अमेरिकी विश्वविद्यालयहरूले सबैभन्दा बढी भिसा स्वीकृत गर्ने महिना मानिन्छ।

यो गिरावटको सबैभन्दा ठूलो असर गत वर्ष विदेशी विद्यार्थीहरूको शीर्ष स्रोत रहेको भारतमा परेको छ, जहाँ अघिल्लो वर्षको तुलनामा ४४.५ प्रतिशत कम विद्यार्थीले भिसा पाएका छन्। यसको विपरीत, चिनियाँ विद्यार्थीहरूका लागि भिसा जारी गर्ने क्रम घटे पनि मुख्य भूमि चीनका ८६ हजार ६४७ भिसा जारी भएका छन्, जुन भारतीयहरूलाई जारी गरिएको सङ्ख्याको दोब्बरभन्दा बढी हो।

ह्वाइट हाउसमा पुनः फर्किएपछि राष्ट्रपति ट्रम्पले आप्रवासन नियन्त्रण र विश्वविद्यालयहरूमाथि दबाब दिने कामलाई उच्च प्राथमिकता दिएका छन्। उनको प्रशासनले विश्वविद्यालय अध्यागमनलाई 'वामपन्थीहरूको प्रमुख शक्ति आधार' को रूपमा हेर्छ।

अमेरिकी विदेशमन्त्री मार्को रुबियोले गत जुनमा केही समयका लागि विद्यार्थी भिसाको प्रक्रिया स्थगित गरेका थिए। रुबियोले अमेरिकी विदेश नीतिको चासोविपरीत जाने मानिसहरूलाई, विशेष गरी इजरायलको आलोचना गरेको आधारमा, प्रवेश अस्वीकार गर्न सक्ने आधारमा हजारौं भिसा रद्द गरेका छन्। 

ट्रम्प प्रशासनले भारतीय आवेदकहरूलाई उनीहरूको देशमा रहेको अमेरिकी वाणिज्य दूतावासको क्षेत्राधिकार बाहिर भिसाका लागि आवेदन दिन अझ गाह्रो बनाएको छ। ट्रम्पले भारतलाई चीनको 'काउन्टरवेट' को रूपमा हेर्ने दशकौंदेखिको अमेरिकी नीतिलाई बेवास्ता गर्दै एच–१ बी भिसामा पनि नयाँ शुल्क लगाएका छन्।

यद्यपि, रुबियोले चिनियाँ विद्यार्थीहरूको भिसा आक्रामक रूपमा रद्द गर्ने प्रतिबद्धता जनाए पनि ट्रम्पले दुई शक्तिहरूबीचको सम्बन्ध बढाउन चिनियाँ विद्यार्थीहरूको सङ्ख्या बढाउने आशा व्यक्त गरेका छन्। पछिल्लो तथ्याङ्कले धेरै मुस्लिम बहुल देशहरूबाट विद्यार्थी भिसामा पनि तीव्र गिरावट देखाएको छ, जसमध्ये इरानबाट भर्ना हुने विद्यार्थीको सङ्ख्या ८६ प्रतिशतले घटेको छ।