तस्बिर–प्रकाशचन्द्र तिमिल्सेना, नेपाल फोटो लाइब्रेरी ।
बर्दिया । बर्दियाको राजापुर नगरपालिका ५ खल्लाजयपुर, बर्दियाका थारु समुदायमा अहिले ‘सखिया नाच’ को रौनकले भरिएको छ । दशैँअघि सुरू भएर दशैँ सकिएको केही दिनसम्म नाचिने सो नाचले थारु गाउँबस्तीको रौनक बढाएको हो ।
थारु गाउँमा दशैँसँगै सखिया नाचको रौनक आउने खल्लाजयपुरका बडघर प्रदेशी चौधरीले बताए । उनका अनुसार यो नाचमा युवती नाच्ने र युवाले मादल बजाउने गर्छन् ।
जति धेरै मादल बज्यो त्यति रौनक आउँछ । २०देखि २५ जना सखिया नाच्ने युवतीले सेतो रङको फरिया, रातो चोलिया र रातै रङको रिबन लगाउने गर्छन् ।
महाभारत कथासँग जोडिएको सखिया नाच सामूहिक रूपमा मादल र मञ्जिरा बजाउँदै, गीत गाउँदै नाचिन्छ ।
धार्मिक तथा सांस्कृतिक महत्त्व रहेको यो नाचमा थारु समुदायका हरेक देवीदेउताका नाम सम्बोधन गरेर सखिया गीत गाइन्छ ।
‘नयाँ पुस्ताले आफ्नो सस्कृती बिर्सदै गयको र थारु संस्कृति जोगाइराख्न पनि यो नाच लाई सधैँ निरन्तरता दिन यो नाच हामी हरेक वर्ष नाच्ने गर्छौं’, बड्घर प्रदेशी चौधरी बताउँछन् ।
