अमेरिका र चीनबीच टिकटक विवाद समाधानको 'ढाँचा' तयार
हाम्रा कुरा
प्रकाशित २०८२ भदौ ३१ मंगलबार
2.2k
Shares
काठमाडौँ । संयुक्त राज्य अमेरिकाले टिकटकको स्वामित्व विवाद समाधान गर्न चीनसँग एउटा सम्झौताको ‘ढाँचा’ तयार भएको घोषणा गरेको छ। यो सम्झौताअनुसार चिनियाँ स्वामित्वको टिकटकलाई अमेरिकी नियन्त्रित स्वामित्वमा सार्न सैद्धान्तिक सहमति भएको हो।
अमेरिकी अर्थमन्त्री स्कट बेसेन्टले म्याड्रिडमा चिनियाँ उपप्रधानमन्त्री हे लिफेङसँग को वार्तालापपछि यो जानकारी दिएका हुन्। उनले भने, “हामीसँग टिकटकसँगको सम्झौताको लागि एक ढाँचा तयार बनेको छ। यसले एपलाई ‘अमेरिकी नियन्त्रित स्वामित्वमा सञ्चालन गर्न’ मार्ग प्रशस्त गर्ने विश्वास लिइएको छ।”
अमेरिकी राष्ट्रपति डोनाल्ड ट्रम्पले पनि आफ्नो सामाजिक सञ्जाल पोस्टमा टिकटकको नाम नलिईकन, “एउटा निश्चित कम्पनीसँग सम्झौता भएको छ, जसलाई हाम्रो देशका युवाहरू निकै बचाउन चाहन्छन्। तिनीहरू धेरै खुशी हुनेछन्,” भनेर लेखेका छन्।
ट्रम्पले शुक्रबार चिनियाँ राष्ट्रपति सी जिनपिङसँग पनि यस विषयमा थप कुराकानी गर्ने बताएका छन्।
टिकटकको स्वामित्व चीनको इन्टरनेट कम्पनी बाइटडान्स सँग छ, र यसका विश्वभर करिब दुई अर्ब प्रयोगकर्ता छन्। अमेरिकी सरकारले राष्ट्रिय सुरक्षाको कारण देखाउँदै टिकटकलाई अमेरिकी कम्पनीलाई बेच्न वा अमेरिकामा प्रतिबन्ध लगाउन दबाब दिँदै आएको थियो।
यसअघि, ट्रम्पले गत जुनमा टिकटकलाई ९० दिनको म्याद थप गरेका थिए, जुन बुधबार सकिँदैछ। ट्रम्पको २०२४ को चुनाव अभियान सामाजिक सञ्जालमा धेरै निर्भर थियो र उहाँले आफूलाई टिकटकको शौखिन भएको बताउँदै प्रतिबन्धलाई रोकेका थिए।
म्याड्रिडमा भएको वार्तामा व्यापार र प्रविधिमा भएका मतभेदहरूलाई कम गर्ने प्रयास गरिएको थियो। यस वार्तामा चिनियाँ आयातमा ट्रम्पले लगाएको कडा करका सम्बन्धमा पनि छलफल भएको थियो, जसले चीन र अमेरिकाबीचको व्यापारिक तनावलाई केही कम गर्ने अपेक्षा गरिएको छ।
