जेनजी आन्दोलन: सिंहदरबारसहित मुख्य सरकारी भवन र नेताका निवासमा क्षति
हाम्रा कुरा
प्रकाशित २०८२ भदौ २४ मंगलबार
1.2k
Shares
काठमाडौँ । जेनजी समूहको प्रदर्शनपछि देशको प्रमुख प्रशासनिक केन्द्र सिंहदरबारसहित महत्त्वपूर्ण सरकारी भवन र नेताहरूको निवासमा ठूलो क्षति पुगेको छ।
बानेश्वरबाट सुरु भएको आन्दोलनले उग्र रूप लिएपछि कार्यपालिका, व्यवस्थापिका र न्यायपालिका का मुख्य भवनहरू जलेका छन्। सिंहदरबारभित्र रहेको प्रधानमन्त्री तथा मन्त्रिपरिषद्को कार्यालय, रामशाहपथस्थित सर्वोच्च अदालत र नयाँ बानेश्वरको सङ्घीय संसद् भवन आगलागीबाट ध्वस्त भएका छन्।
यसबाहेक, प्रदर्शनकारीहरूले रामशाहपथको महान्यायाधिवक्ताको कार्यालय र बग्गीखानास्थित ट्राफिक प्रहरी कार्यालय मा पनि आगजनी गरेका छन्।
नेताका निवासमा तोडफोड र आगजनी
आन्दोलनकारीको निशानामा शीर्ष नेताहरूको निवास पनि परेको छ। नेकपा (एमाले) का अध्यक्ष केपी शर्मा ओली, नेपाली कांग्रेसका सभापति शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' र पूर्वप्रधानमन्त्री झलनाथ खनाल लगायतका नेताहरूको निवासमा तोडफोड र आगजनी भएको छ।
एमाले नेताहरू गोकुल बास्कोटा, महेश बस्नेत र महेश बर्ताैला का निवासमा पनि आगजनी र तोडफोड गरिएको छ। आन्दोलनकारीले केही नेताहरूमाथि हातपात समेत गरेको सूचना प्राप्त भएको छ।
सोमबारको प्रदर्शनमा प्रहरी कारबाहीमा १९ जना युवाको मृत्यु भएपछि आन्दोलन थप हिंसात्मक बनेको हो।
