कोशी, तराई र बागमतीका पहाडी भागमा भारी वर्षाको सम्भावना
हाम्रा कुरा
प्रकाशित २०८२ भदौ १८ बुधबार
657
Shares
काठमाडौँ। जल तथा मौसम पूर्वानुमान महाशाखाका अनुसार, मनसुनको न्यून चापीय रेखा सरदर स्थानभन्दा दक्षिणतिर रहेकोले आज दिउँसो देशभरको मौसम साधारणतया बदली रहनेछ। लुम्बिनी प्रदेशका साथै पहाडी भूभाग र तराईका केही स्थानहरूमा मध्यम वर्षाको सम्भावना रहेको छ।
आज राति कोशी र मधेश प्रदेशसहित देशका पहाडी भागमा साधारणतया बदली रहनेछ भने बाँकी क्षेत्रमा आंशिक बदली हुनेछ। कोशी, मधेश, बागमती र गण्डकी प्रदेशका केही तथा अन्य प्रदेशका पहाडी भागका केही स्थानहरूमा मध्यम वर्षाको सम्भावना छ। विशेषगरी, कोशी, तराई र बागमती प्रदेशका पहाडी भागका एक-दुई स्थानमा भारी वर्षाको पनि सम्भावना रहेको छ।
महाशाखाले भारी वर्षाका कारण पहिरो र गेग्रान बहाव (डेब्रिज फ्लो) को जोखिम बढ्न सक्ने चेतावनी दिएको छ। साथै, ठूला र साना नदीनाला तथा खोलाहरूमा पानीको सतह बढ्ने र यातायातमा समेत असर पर्न सक्ने भएकाले सतर्क रहन र पूर्वतयारी गर्न सबैलाई आग्रह गरिएको छ।
