काठमाडौं । भारतले नेपाललाई ५-० गोल अन्तरले पराजित गर्दै एक खेल अगावै साफ यु-१७ महिला च्याम्पियनसिपको उपाधि जितेको छ। शुक्रबार सम्पन्न खेलमा भारतले नेपालमाथि सहज जित दर्ता गरेको हो।
यो जितसँगै भारतले ५ खेलबाट १५ अंक जोड्दै तालिकाको शीर्ष स्थानमा आफ्नो पकड बनाएको छ। समान खेलबाट १० अंक जोडेको बंगलादेश दोस्रो स्थानमा छ। नेपालले भने ५ खेलमा ३ अंकका साथ तेस्रो स्थानमा चित्त बुझाएको छ भने १ अंकसहित भुटान पुछारमा छ।
भारतले यसअघि सन् २०१८ र २०१९ मा पनि यो उपाधि जितेको थियो। अब च्याम्पियनसिपको अन्तिम खेलमा भारत र बंगलादेश तथा नेपाल र भुटान भिड्नेछन्।
