काठमाडौँ । रेडक्रसको अन्तर्राष्ट्रिय समितिले शुक्रबार जारी गरेको तथ्याङ्क अनुसार विश्वभर १० लाखभन्दा बढी मानिस बेपत्ता भएका छन्, जुन पाँच वर्षअघिको तुलनामा करिब ७० प्रतिशतले बढी हो। बढ्दो द्वन्द्व, व्यापक आप्रवासन र युद्धका नियमहरूको घट्दो सम्मानका कारण यो सङ्ख्या बढेको प्रतिवेदनमा उल्लेख छ।
आईसीआरसीका महानिर्देशक पियरे क्राहेनबुहलले यो प्रवृत्तिको उदाहरण दिँदै सुडानदेखि युक्रेन, सिरियादेखि कोलम्बियासम्मका द्वन्द्वमा युद्धरत पक्षहरूले मानिसहरूको सुरक्षा गर्न असफल भएको बताएका छन्। उनले भने, “यो तथ्याङ्क ‘हिमशैलको टुप्पो मात्र हो’ किनकि विश्वभर लाखौँ मानिस वर्षौं वा दशकौंसम्म आफ्ना प्रियजनबाट अलग छन्।”
आईसीआरसीको फेमिली लिङ्क नेटवर्कमा सन् २०२४ को अन्त्यसम्ममा २ लाख ८४ हजार ४०० व्यक्ति बेपत्ताको सूचीमा दर्ता भएका छन्। गत वर्ष १६ हजारभन्दा बढी व्यक्ति फेला परेका थिए र ७ हजारभन्दा बढीलाई उनीहरूको परिवारसँग पुनर्मिलन गराइएको थियो। सम्पर्कका लागि ९० हजार ५०० भन्दा बढी रेडक्रस सन्देश र २३ लाख फोन कलहरूको व्यवस्था मिलाइएको थियो।
आईसीआरसीले सशस्त्र द्वन्द्वका राज्य र पक्षहरूलाई बेपत्ता हुनबाट रोक्न, बेपत्ता व्यक्तिहरूको अवस्थाबारे जानकारी दिन र परिवारहरूलाई सहयोग प्रदान गर्न प्राथमिक जिम्मेवारी वहन गर्न आग्रह गरेको छ। प्रतिवेदनले अन्तर्राष्ट्रिय मानवीय कानुनको सम्मान गर्दा बेपत्ता हुने जोखिम कम हुने र शान्ति निर्माण तथा मेलमिलापमा सहयोग पुग्नेमा जोड दिएको छ। युद्धका नियमहरूले परिवारलाई अलग हुन नदिने र कैदीबन्दीबारे जानकारी दिनेजस्ता व्यवस्थाले यो मानवीय त्रासदी कम गर्न मद्दत गर्ने आईसीआरसीको भनाइ छ।
