पोखरा। म्याग्दीको बेनीमा मोटरसाइकलको ठक्कबाट एक बालकको ज्यान गएको छ । मृत्यु हुनेमा बेनी नगरपालिका वडा नं ३ डाँडाखानीका ५ वर्षीय छोरा केविन परियार छन्।
जिल्ला प्रहरी कार्यालय म्याग्दीका अनुसार शनिबार दिउँसो बेनी नगरपालिका वडा नं २ हाँडेभिरमा ध२प ६९६ नम्वरको मोटरसाइकलले ठक्कर दिँदा केविन गम्भीर घाइते भएका थिए ।
घाइते केविनलाई तत्कालै उद्धार गरी उपचारका लागि प्रदेश अस्पताल वेनी लगिएको थियो । त्यहाँ समान्य उपचारपछि उनलाई थप उपचारका लागि पोखराको मणिपाल शिक्षण अस्पताल ल्याइएकामा चिकित्सकले मृत घोषणा गरेको म्याग्दी प्रहरीका सूचना अधिकारी प्रहरी निरीक्षक सागर पौडेलले जानकारी दिए ।
मोटरसाइकल चालक विशन सापकोटालाई प्रहरीले नियन्त्रणमा लिएको छ । घटनाका विषयमा थप अनुसन्धान भइरहेको प्रहरी निरीक्षक पौडेलले बताए ।
