गाजामा स्वास्थ्य संकट: सहायता आपूर्ति सहज बनाउन इजरायललाई डब्ल्यूएचओको आग्रह
हाम्रा कुरा
प्रकाशित २०८२ साउन २८ बुधबार
1.4k
Shares
काठमाडौँ । संयुक्त राष्ट्रसंघको स्वास्थ्य निकाय विश्व स्वास्थ्य संगठन (डब्ल्यूएचओ) ले इजरायललाई गाजाको स्वास्थ्य संकटलाई 'विपत्तिपूर्ण' भन्दै गाजा सिटीमा आक्रमण गर्नुअघि महत्त्वपूर्ण चिकित्सा सामग्रीहरूको भण्डारण गर्न अनुमति दिन आग्रह गरेको छ। इजरायलले गाजा सिटी नियन्त्रणमा लिने योजना अघि बढाउने बताएपछि विश्वभर यसको आलोचना भइरहेको छ।
डब्ल्यूएचओका फिलिस्तीनी क्षेत्र प्रतिनिधि रिक पीपरकोर्नका अनुसार, गाजामा हाल ५२% औषधिहरूको भण्डारण शून्य अवस्थामा छ। उनले भने, "हामीले समाचारमा सुनिरहेकै अनुसार, सम्भावित आक्रमणअघि अस्पतालहरूलाई शीघ्र रूपमा आपूर्ति पुर्याउन चाहन्छौं, तर अहिलेको अवस्थामा त्यो सम्भव भएको छैन।"
गाजामा मानवीय सहायताको आपूर्ति पर्याप्त नभएको भन्दै डब्लुएचओले चिन्ता व्यक्त गरेको छ। पीपरकोर्नका अनुसार, इजरायली पक्षले धेरै सामग्रीहरूलाई अझै पनि प्रवेश गर्न दिएको छैन।
गाजामा हाल ५०% अस्पताल र ३८% प्राथमिक स्वास्थ्य केन्द्रहरू मात्र आंशिक रूपमा सञ्चालनमा छन्। अस्पतालहरूमा बिरामीको चाप अत्यधिक छ, जस्तै उत्तरी गाजाको अल–शिफा अस्पतालमा शैय्या क्षमता २४०% र अल–आहली अस्पतालमा ३००% पुगेको छ।
गाजामा भोकमरी र कुपोषणको समस्या पनि बढिरहेको छ। अगस्ट ५ सम्मको तथ्यांकअनुसार, यो वर्ष कुपोषणका कारण १४८ जनाको ज्यान गइसकेको छ। गत जुलाईमा ५ वर्षमुनिका करिब १२ हजार बालबालिका तीव्र कुपोषणबाट ग्रस्त भेटिएका थिए, जुन गाजामा एकै महिनामा देखिएको सबैभन्दा उच्च संख्या हो। तीमध्ये २ हजार ५६२ बालबालिका गम्भीर कुपोषणबाट पीडित छन्।
