गाजामा इजरायली आक्रमण: सहायता पर्खिरहेका १४ जनासहित २६ को मृत्यु
हाम्रा कुरा
प्रकाशित २०८२ साउन २१ बुधबार
1.3k
Shares
काठमाडौँ । गाजाको नागरिक सुरक्षा निकायका अनुसार इजरायली गोली प्रहार र हवाई आक्रमणमा कम्तीमा २६ जनाको मृत्यु भएको छ। यीमध्ये १४ जना मानवीय सहायता वितरण केन्द्र नजिकै पर्खिरहेका बेला मारिएका थिए।
दक्षिण गाजाको खान युनिसमा सहायताको प्रतीक्षा गरिरहेका आठ जना इजरायली गोली प्रहारबाट मारिएका थिए भने मध्य गाजामा थप छ जनाको ज्यान गएको पुष्टि भएको छ।
यसैगरी, अल-मावासी क्षेत्रमा रहेको एउटा टेन्टमा गरिएको हवाई आक्रमणमा पाँच जनाको मृत्यु भएको जनाइएको छ। गाजा सहर र खान युनिसमा भएका अन्य आक्रमणहरूमा थप सात जनाको ज्यान गएको छ।
गाजाका स्थानीय बासिन्दाहरूले मानवीय सहायता वितरण केन्द्रहरूमा मानिसहरूको भीडभाड भइरहेका बेला पनि गोली प्रहारका घटनाहरू दोहोरिएको बताएका छन्। इजरायली सेनाले भने यस घटनाको अनुसन्धान भइरहेको जानकारी दिएको छ।
