काठमाडौँ। दक्षिण कोरियाले सन् २०२५ को पहिलो पाँच महिनामा जन्मदरमा कीर्तिमानी वृद्धि हासिल गरेको छ। यो सन् १९८१ मा तथ्याङ्क सङ्कलन सुरु भएयताकै सबैभन्दा उच्च वृद्धिदर भएको कोरियाली तथ्याङ्क कार्यालयले जनाएको छ।
अधिकारी काङ ह्युन-योङले दिएको जानकारीअनुसार, जनवरीदेखि मे महिनासम्मको अवधिमा कुल १ लाख ६ हजार ४८ शिशुको जन्म भएको छ। यो अघिल्लो वर्षको सोही अवधिको तुलनामा ६.९ प्रतिशतले बढी हो। दक्षिण कोरियामा एक दशकभन्दा बढी समयपछि पहिलो पटक शिशुको जन्मदर र सङ्ख्यामा वृद्धि भएको हो।
विश्लेषकहरूका अनुसार, यो वृद्धिको प्रमुख कारण गत वर्ष विवाहको सङ्ख्यामा भएको वृद्धि हो। सन् २०२४ मा दक्षिण कोरियामा विवाहको सङ्ख्या १४.८ प्रतिशतले बढेको थियो, जसको सीधा सम्बन्ध अहिलेको जन्मदर वृद्धिसँग रहेको छ। यद्यपि, हालको प्रजनन दर ०.७५ मात्र छ, जबकि ५ करोड १० लाख जनसङ्ख्या कायम राख्न २.१ बालबालिकाको प्रजनन दर आवश्यक पर्छ।
जन्मदर कम हुनुमा बच्चा हुर्काउँदा लाग्ने अत्यधिक खर्च, महिलाहरूको करियर र पारिवारिक जीवनबीचको सन्तुलन कायम गर्नुपर्ने चुनौतीलाई प्रमुख कारक मानिएको छ। यो समस्या समाधान गर्न सरकारले नगद अनुदान, अस्थायी बच्चा हेरचाह सेवा र बाँझोपनको उपचारमा सहयोग लगायतका विभिन्न कार्यक्रमहरू सञ्चालन गर्दै आएको छ।
दक्षिण कोरियाको यो जनसाङ्ख्यिकीय चुनौती विश्वका धेरै विकसित राष्ट्रहरूले भोगिरहेको समस्यासँग मिल्दोजुल्दो छ। यद्यपि, दक्षिण कोरियामा जन्मदर वृद्धि हुनुलाई सकारात्मक सङ्केतका रूपमा लिइएको छ।
