नवलपुर (नवलपरासी) । पूर्वपश्चिम राजमार्गअन्तर्गत निर्माणाधीन नारायणघाट–बुटवल चार लेन सडकको म्याद एक वर्ष थपिने भएको छ। सडक विभाग आयोजना निर्देशनालय (एडिबी) का आयोजना निर्देशक इञ्जिनियर चुडाराज ढकालले निर्माण कम्पनीले ९० प्रतिशत काम सक्ने सहमति गरेपछि म्याद थपिने तयारी गरिएको जानकारी दिए।
"निर्माण कम्पनी र आयोजनाको कन्सल्टेन्टसँग कुरा गर्दा एक वर्षमा फिनिसिङबाहेकका काम सकाउने सहमति भएको कारण म्याद थप्ने तयारी गरेका छौँ," ढकालले भने, "निर्माण कम्पनीले ९० प्रतिशत काम सकाउने सहमति भएपछि हामी एक वर्ष म्याद थप गर्ने निष्कर्षमा पुगेका छौँ।" यो सडक योजनाको तेस्रोपटक थप भएको म्याद यही साउन ८ गते सकिँदैछ। हालसम्म आयोजनाको भौतिक प्रगति ६९.३ प्रतिशत सकिएको ढकालले बताए।
नारायणघाट–बुटवल सडक योजना (पूर्वी खण्ड) का सूचना अधिकारी इञ्जिनियर शिव खनालका अनुसार अहिले निर्माण कम्पनीले दाउन्ने खण्डमा काम गरिरहेको छ। दाउन्नेमा सडकका कारण यात्रुलाई समस्या परेकाले त्यहाँ ढलान गर्न जनशक्ति केन्द्रित गरिएको छ। दाउन्नेमा सडक ढलानसहित चोरमारामा कालोपत्र, पुल निर्माण, दुई लेन सडक भएको ठाउँमा चार लेन बनाउने र डिभाइडर बनाउने काम भइरहेको छ। सडक विस्तारका लागि अहिले २७२ जना श्रमिक काम गरिरहेका छन्।
यस खण्डमा पर्ने साना पुल निर्माण सम्पन्न भई सवारीसाधन सञ्चालनमा आए पनि ठूला पुल बन्ने क्रम जारी रहेको खनालले बताए। डण्डाको सुक्खा खोलामा ठूलो पुल निर्माण भएर पनि एप्रोच रोड (पहुँच मार्ग) बनाउन बाँकी रहेका कारण सो पुल सञ्चालनमा आउन नसकेको उनले जानकारी दिए। "अहिले चोरमाराको पुलमा काम भइरहेको छ, बेल्डिहा खोलाको पुल दुई–तीन दिनमा सञ्चालनमा आउँछ, त्यस्तै जयश्री खोलाको पुलमा ढलानको काम चाँडै गर्दैछौँ, अहिले पूर्वी खण्डको काम धमाधम अगाडि बढिरहेको छ।"
गैँडाकोटको पुलचोकमा १०० मिटर सडक कालोपत्र गर्न बाँकी रहे पनि अबको एक महिनाभित्र गरिने खनालले उल्लेख गरे। यस खण्डमा पुल भएको ठाउँमा, चोरमारामा र दुम्कीबासबाट दाउन्नेसम्म करिब सात किलोमिटर कालोपत्र गर्न बाँकी रहेको उनले बताए। नारायणघाट–बुटवल सडकको कुल ११४ किलोमिटरमध्ये पूर्वी खण्डमा करिब ६५ किलोमिटर पर्छ। पूर्वी खण्डमा पर्ने सडकमध्ये डेढ किलोमिटर जति क्षेत्रफल पुलले ओगटेको छ भने बाँकी रहेको करिब सात किलोमिटर सडक पनि चाँडै कालोपत्र हुनेछ। अहिले दाउन्नेबाहेकको खण्डमा यात्रा सहज भएको खनालले जानकारी दिए।
एक वर्षमा यस खण्डको भौतिक प्रगति करिब २० किलोमिटर थपिएको छ। "दोस्रोपटक थप गरिएको म्याद सकिँदा यस खण्डमा कालोपत्र सडक २९ किलोमिटरमात्र थियो," उनले भने, "असार मसान्तसम्म अहिले पूर्वी खण्डमा ५६ किलोमिटर सडक कालोपत्र भएको छ।" चिनियाँ निर्माण कम्पनी 'चाइना स्टेट कन्स्ट्रक्सन इञ्जिनियरिङ कर्पोरेसन लिमिटेड' ले सडक विस्तारको काम गरिरहेको छ।
निर्माण कम्पनीले नेपाल सरकारसँग २०७५ साल माघ २४ गतेदेखि काम सुरु गरी ४२ महिनामा सक्ने गरी ठेक्का सम्झौता गरेको थियो। निर्धारित समयमा काम नसकिएपछि निर्माण कम्पनीले विभिन्न कारण देखाउँदै सडक विस्तारको म्याद थप गर्दै आएको छ। अब थप हुने म्याद अन्तिम भएको सडक विभाग आयोजना निर्देशनालय एडिबीका आयोजना निर्देशक इञ्जिनियर चुडाराज ढकालले बताए।
दुई खण्डमा विभाजन गरी काम भइरहेको नारायणघाट–बुटवल सडक विस्तार योजनाको कुल लागत १६ अर्ब ९९ करोड ५२ लाख रुपैयाँ छ। नारायणघाट–बुटवल सडक योजना पूर्वी खण्ड (गैँडाकोट–दाउन्ने) ६५ किलोमिटरको लागत ९ अर्ब १३ करोड १८ लाख ९५ हजार रुपैयाँ छ भने पश्चिम खण्ड (दाउन्ने–बुटवल) ४९ किलोमिटरको लागत ७ अर्ब ८६ करोड ३४ लाख रुपैयाँ छ। यो आयोजना एसियाली विकास बैंक (एडिबी) को ८५ प्रतिशत ऋण सहयोगमा अघि बढाइएको हो, जसमा बाँकी रकम नेपाल सरकारको छ।
