काठमाडौँ । युरोपेली आयोगकी अध्यक्ष उर्सुला भोन डेर लेयेनले युरोपेली सङ्घ (ईयू) अमेरिकासँग जारी कर विवाद समाधानका लागि ‘सम्झौताका लागि तयार’ रहेको बताएकी छिन्। उनले युरोपको हितको रक्षाका लागि कुनै सन्तोषजनक सम्झौता हुन नसक्ने सम्भावनाबीच पनि वार्ताका लागि तयारी गरिरहेको स्पष्ट पारेकी छिन्।

भोन डेर लेयेनले आरहुसको भ्रमणका क्रममा जुलाई ९ सम्मको समयसीमा रहेको उल्लेख गर्दै ईयू र संयुक्त राज्य अमेरिकाबीचको व्यापार १.५ ट्रिलियन युरो (१.७७ ट्रिलियन अमेरिकी डलर) रहेको बताइन्। युरोपेली आयोगले जारी गरेको विज्ञप्तिमा उनको भनाइ उद्धृत गर्दै भनिएको छ, "यो ठूलो काम हो।"

‘सैद्धान्तिक रूपमा एउटा सम्झौता’ मा पुग्ने लक्ष्यमा जोड दिँदै भोन डेर लेयेनले दुई पक्षबीच व्यापारको विशाल परिमाणका कारण यो छोटो समयसीमाभित्र विस्तृत सम्झौतालाई अन्तिम रूप दिन असम्भव हुने बताएकी छिन्।

उनले वार्ता असफल भएमा ईयूले प्रतिशोधात्मक कदम चाल्न नहिचकिचाउने पनि बताएकी छिन्। "हामी सँगसँगै चित्तबुझ्दो सम्झौता हुन नसक्ने सम्भावनाका लागि तयारी गरिरहेका छौँ भन्ने तपाईँहरू सबैलाई थाहा छ। हामी वार्ताबाट समाधान चाहन्छौँ," उनले भनिन्।

हाल व्यापार र आर्थिक सुरक्षाका लागि युरोपेली आयुक्त मारोस सेफकोभिक वासिङ्टनमा रहेका छन्, जहाँ उनले सम्झौता गर्ने प्रयासमा अमेरिकी व्यापार प्रतिनिधिहरूसँग छलफल गरिरहेका छन्।

यसैबीच, जर्मनीका चान्सलर फ्रेडरिक मर्जले पनि दुवै पक्षलाई ‘छिटो र सरल सम्झौता’ गर्न आग्रह गर्दै यस्तो सम्झौता फार्मास्युटिकल्स, इन्जिनियरिङ र अटोमोटिभ म्यानुफ्याक्चरिङ लगायत प्रमुख क्षेत्रका लागि महत्त्वपूर्ण रहेकोमा जोड दिएका छन्।

हाल संयुक्त राज्य अमेरिकाले ईयूका कार र अटो पार्ट्समा २५ प्रतिशत र स्टिल तथा आल्मुनियमका उत्पादनहरूमा ५० प्रतिशत कर लगाएको छ। संयुक्त राज्य अमेरिकाले काठ, एयरोस्पेसका सामान तथा उपकरण, फार्मास्युटिकल्स, सेमीकन्डक्टर र महत्त्वपूर्ण खनिजहरू समावेश गर्न कर विस्तार गर्ने तयारी गरिरहेको बताएको छ।