काठमाडौं। अमेरिकी राष्ट्रपति डोनाल्ड ट्रम्पले सोमबार इरानले कतारमा रहेको अमेरिकी सैन्य अड्डामा मिसाइल आक्रमण गरेको पुष्टि गरेका छन्। इरानले आफ्नो आणविक सुविधाहरूमा हालै भएको अमेरिकी हवाई आक्रमणको प्रतिक्रिया स्वरूप यो आक्रमण गरेको ट्रम्पले बताए। उनले यसलाई धेरै कमजोर प्रतिक्रिया को रूपमा वर्णन गर्दै कुनै मानवीय क्षति नभएको जानकारी दिए।
ट्रम्पका अनुसार, इरानले कुल १४ वटा मिसाइल प्रहार गरेको थियो। तीमध्ये १३ वटा मिसाइल रोकिएको र एउटालाई कुनै खतरा नभएकाले अगाडि बढ्न अनुमति दिइएको थियो। राष्ट्रपति ट्रम्पले इरानले प्रारम्भिक सूचना प्रदान गरेकोमा धन्यवादसमेत व्यक्त गरे।
कतारको विदेश मन्त्रालयका प्रवक्ता माजेद अल–अन्सारीले पनि सोमबार आफ्नो राजधानी दोहामाथि धेरै इरानी मिसाइलहरूको अवरोध पुष्टि गरेका छन्। तेहरानले अल उदेद एयर बेसमा अमेरिकी सेनालाई लक्षित गरेर आक्रमण भएको दाबी गरेको थियो।
यो घटनाले मध्यपूर्वमा जारी तनाव र शक्ति राष्ट्रहरूबीचको टकरावलाई थप पेचिलो बनाएको छ। यस घटनाको दीर्घकालीन असर के होला भन्ने विषयमा अन्तर्राष्ट्रिय समुदायको ध्यान केन्द्रित भएको छ।
