काठमाडौँ । जर्मनीका चान्सलर फ्रेडरिक मर्जले अमेरिकी राष्ट्रपति डोनाल्ड ट्रम्पसँग अमेरिकी राष्ट्रपतिको कार्यालय, ओभल अफिसमा भेटवार्ता गरेका छन्। युक्रेनको अवस्था, कर वृद्धिको सम्भावना र ट्रम्प प्रशासनले जर्मनीका अति दक्षिणपन्थी समूहहरूलाई दिएको समर्थनजस्ता विभिन्न विवादास्पद विषयहरूका बीच मर्जको यो प्रत्यक्ष भेटवार्ता भएको हो।

आफ्नो निर्वाचनपछि पहिलो पटक अमेरिकाको भ्रमणमा रहेका ६९ वर्षीय कन्जरभेटिभ नेता मर्जलाई ७८ वर्षीय रिपब्लिकन नेता ट्रम्पले वेस्ट विङबाहिरको पहिलो प्रत्यक्ष बैठकको सुरुवातमा स्वागत गर्दा दुवै नेता हँसिलो र आशावादी मुद्रामा देखिएका थिए।

जर्मनीका सञ्चारमाध्यमहरूका अनुसार, आफ्नो कार्यकाल सुरु भएको एक महिनापछि चान्सलर मर्जले युद्धपछिको जर्मनीको 'अपरिहार्य' सहयोगीको रूपमा रहेको अमेरिकासँग राम्रो सम्बन्ध कायम राख्न कोसिस गर्दै ट्रम्पसँग सम्बन्ध बनाउने प्रयास गरेका छन्।

यो भेटमा मर्जले जर्मनीको नेटो खर्चमा तीव्र वृद्धि गर्ने र युक्रेनमा भ्लादिमिर पुटिनको सामना गर्ने साझा आधार खोज्ने प्रतिबद्धता व्यक्त गर्ने अनुमान गरिएको थियो।

ट्रम्पले युरोपेली सङ्घ (ईयू) मा चर्को कर वृद्धि गर्ने धम्की दिएको विषयमा, युरोपेली सङ्घको सबैभन्दा ठूलो अर्थतन्त्र मानिने जर्मनीका नेता मर्जले भेटअघि वासिङ्टनसँगको वार्तामा आफू आत्मविश्वासी हुनुपर्ने तर्क गरेका थिए।

न्युयोर्क टाइम्सका अनुसार, ट्रम्पले जर्मनीमा अभिव्यक्ति स्वतन्त्रताको मुद्दालाई लिएर मर्जसँग चासो व्यक्त गरेका छन्। बैठकअघि वासिङ्टनमा पत्रकारहरूसँग कुरा गर्दै मर्जले यदि ट्रम्पले जर्मनीको आन्तरिक राजनीतिका बारेमा आवश्यक परेको खण्डमा आफ्नो विचार स्पष्टसँग राख्ने बताएका थिए।

जर्मन चान्सलर मर्जले व्यापार तनावका बावजुद अमेरिकी राष्ट्रपति ट्रम्पसँग आफ्नो पहिलो आमनेसामने बैठकको लागि आफू 'प्रतिक्षारत' रहेको बताएका थिए। उनले बैठकअघि गरेको पोस्टमा लेखेका थिए, "युरोपको सुरक्षा, स्वतन्त्रता र समृद्धिका लागि अमेरिकासँग हाम्रो गठबन्धन सर्वोपरि थियो, छ र रहनेछ।"