काठमाडौं । अमेरिकी राष्ट्रपति डोनाल्ड ट्रम्पले राष्ट्रिय एरोनटिक्स एन्ड स्पेस एडमिनिस्ट्रेशन (नासा) को प्रमुख पदमा प्रस्तावित जेरेड इसाकम्यानको मनोनयन फिर्ता लिएका छन्। यस निर्णयसँगै अर्बपति व्यापारी तथा एलन मस्कका निकट सहयोगी मानिने इसाकम्यान नासाको सर्वोच्च पदमा पुग्नबाट वञ्चित भएका छन्।
शनिबार ह्वाइट हाउसले नासाको नयाँ प्रमुखका लागि उम्मेदवारको घोषणा छिट्टै गरिने जानकारी दिएको छ। राष्ट्रपति ट्रम्पले आफ्नै सामाजिक सञ्जाल 'ट्रुथ सोसल' मा यससम्बन्धी जानकारी दिँदै लेखेका छन्, "नासाको प्रमुखका लागि जेरेड इसाकम्यानको मनोनयन फिर्ता लिएको छु। म चाँडै नै नयाँ मनोनीतको घोषणा गर्नेछु। नयाँ उम्मेदवार छिट्टै मिसनमा आबद्ध हुनुहुनेछ र अमेरिकालाई अन्तरिक्षको दौडमा पहिलो स्थानमा राखिरहन नेतृत्व गर्नुहुनेछ।"
गत वर्षको अन्त्यमा ट्रम्पले निजी अन्तरिक्ष उडानका अग्रगामी मानिने इसाकम्यानलाई नासाको प्रमुखका रूपमा मनोनित गरेका थिए। सिनेटको वाणिज्य, विज्ञान र यातायात समितिले अप्रिलको अन्त्यमा उनको नामाङ्कनलाई अनुमोदन गरिसकेको थियो, जसले उनलाई नासाको नेतृत्वका लागि थप एक कदम नजिक पुर्याएको थियो।
इसाकम्यान, जो एलन मस्कका निकट सहयोगी तथा उनको कम्पनी स्पेसएक्सका प्रमुख ग्राहक पनि हुन्, उनले स्पेसएक्सबाट करोडौं डलरमा थुप्रै निजी अन्तरिक्ष उडानहरू खरिद गरेका छन्। उनको मनोनयन फिर्ता गरिनुको कारणबारे विस्तृत विवरण सार्वजनिक नगरिए पनि, यस घटनाले अमेरिकी अन्तरिक्ष नीतिमा सम्भावित परिवर्तनको सङ्केत दिन सक्ने अनुमान गरिएको छ।
