रविको आदेशसँगै समर्थक निराश, पार्टीले बोलायो सचिवालय र केन्द्रीय समिति बैठक [फोटोफिचर]
हाम्रा कुरा
प्रकाशित २०८२ जेठ १० शनिबार
837
Shares
तस्बिर – रवि लामिछाने समर्थकहरु शुक्रबार बेलुकी सर्वोच्च अदालत परिसर बाहिर ।
काठमाडौँ । सर्वोच्च अदालतले राष्ट्रिय स्वतन्त्र पार्टी रास्वपाका सभापति रवि लामिछानेलाई थुनामा राख्ने उच्च अदालत तुलसीपुर बुटवल इजलासको आदेशलाई सदर गरेको छ ।
थुनामुक्त गर्न माग गर्दै लामिछानेको पत्नी निकिता पौडेलले दायर गरेको बन्दी प्रत्यक्षीकरणको रिट निवेदनको सुनुवाइपछि शुक्रबार न्यायाधीशद्वय डा नहकुल सुवेदी र बालकृष्ण ढकालको संयुक्त इजलासले बुटवल इजलासकै आदेश सदर गरेको हो ।
आदेश भनिएको छ, “अदालतबाट निवेदक प्रतिवादीहरू रवि लामिछाने र छविलाल जोशीलाई पछि प्रमाण बुझ्दै जाँदा ठहरे बमोजिम हुनेगरी पुर्पक्षका लागि थुनामा राखी मुद्दाको कारबाही र किनारा गर्नेगरी भएको मिति २०८१–१२–२२ को आदेश बेरितको नदेखिँदा बदर गरिरहनु परेन, कानून बमोजिम गर्नू ।”
सुप्रिम सहकारी ठगी प्रकरणमा कारागार कार्यालय भैरहवा रुपन्देहीमा पुर्पक्षमा थुनामा रहेका पूर्वगृहमन्त्रीसमेत रहेका लामिछाने तर्फबाट दायर भएको उक्त रिट निवेदनमाथिको सुनुवाइ अदालतले सो आदेश गरेको हो ।
समर्थक निराश
रास्वपा सभापति रवि लामिछानेको मुद्दामा शुक्रबारै आदेश आउने भएपछि सर्वोच्च अदालत परिसर बाहिर समर्थकहरुको भीड लागेको थियो । रवि छुट्नेमा अधिकांश समर्थक आशावादी थिए ।
उनीहरु प्रत्यक्ष नै सर्वोच्च अदालतमा पुगेर रवि रिहा भएको हेर्न चाहन्थे । तर कानूनी प्रक्रिया सबैलाई थाहा हुने कुरा भएन । उनी कानूनतः चुकेका छन् । त्यसैले उनलाई थुनामै पठाउने आदेश सर्वोच्चले गरेको छ ।
रास्वपाले बोलायो सचिवालय र केन्द्रीय समिति बैठक
राष्ट्रिय स्वतन्त्र पार्टी (रास्वपा) ले पार्टी सचिवालय र केन्द्रीय समितिको बैठक बोलाएको छ । सर्वोच्च अदालतको आदेशपछि रास्वपा फेरि रणनीति बनाउन बाध्य भएको हो ।
रवि लामो समय थुनामा थिए । त्यसपछि उनी तारेखमा छुटे पनि पार्टीको काम खुलेआम गर्दैनथे । तर जब उनले आफू तारेखमा रहँदा रहँदै पार्टीमा सक्रिय हुन थाले तब उनी फेरि थुनामा परे ।
उनले आफ्नो सांसद पद फुकुवा गर्न सभामुखलाई भेटे । अनि फेरि आफूले सभापतिको कार्यभार सम्हाले ।
जबकि उनीमाथि चार ओटा सहकारी ठगेको मुद्दा छ । उनले आफू दोषमुक्त भएको (स्वघोषणा) भन्दै पार्टीको जिम्मेवारी सम्हालेपछि उच्च अदालत तुलसीपुर, बुटवल इजलासले जिल्ला अदालतको धरौटी राखेर छुट्ने आदेश उल्टाएर थुनामा राख्ने आदेश दिएको थियो ।
पार्टीमा फेरि थप संकट आएसँगै रास्वपाले सचिवालय र केन्द्रीय समिति बैठक बोलाएको हो । उनको बन्दी प्रत्यक्षीकरणको रिटमा उच्च अदालतको आदेश सदर भएसँगै अब लामो समय जेल बस्नुको विकल्प उनीसँग रहेन ।
यस अर्थमा पनि पार्टीले शनिबार र आइतबारका लागि सचिवालय र केन्द्रीय समिति बैठक डाकेको हो ।
शनिबार भर्चुअल र आइतबार फिजिकल बैठक हुनेछ ।
शनिबार दिउँसो ३ बजे पार्टी सचिवालयको भर्चुअल बैठक र ४ बजे केन्द्रीय समितिको भर्चुअल बैठक बस्ने रास्वपाले जनाएको छ ।
आइतबार दिउँसो २ बजे पार्टी कार्यालयमा केन्द्रीय समितिको बैठक बस्नेछ ।
तस्बिर शुक्रबार बेलुकी सर्वोच्च अदालत परिसरमा उपस्थित समर्थकहरुको हो । कुनै अप्रिय घटना नहोस् भनी सुरक्षाकर्मी बाक्लो रुपमा परिचालन गरिएको थियो ।
