काठमाडौँ । काठमाडौँमा जारी शिक्षकहरूको आन्दोलनमा आइतबार झडप भएको छ । यसअघि शान्तिपूर्ण प्रदर्शन गर्दै आइरहेका शिक्षकहरूले आज निषेधित क्षेत्र तोड्ने प्रयास गरेपछि प्रहरीसँग झडप भएको हो ।
गत चैत २० गतेदेखि शिक्षकहरु आन्दोलित छन् । उनीहरुले अहिलेसम्म संयमित आन्दोलन गरेको भए पनि आज भने निषेधित क्षेत्र तोड्न खोज्दा प्रहरीले पनि बल प्रयोग गरेको हो ।
बल प्रयोगपछि शिक्षकहरूले पनि ढुंगामुढा गर्न थालेका थिए । प्रहरीले आन्दोलनकारीमाथि पानीको फोहरासमेत प्रयोग गरेको छ ।
विभिन्न माग राखेर देशभरका सरकारी शिक्षक काठमाडौंमा आन्दोलनरत छन् ।
प्रहरीले एक जनालाई पक्राउ गरेको छ । झडप हुँदा केही घाइते भएका छन् ।
