-
-
-
-
खोज्छु भाग्न मृत्युसँग
तर मृत्यु झन् नजिक आउँछ
चाहना छ बाँच्ने
तर आशाहरू निरर्थक देखिन्छ
गोरेटोमा पाइला चाल्दा
भेटिन्छन् स्वार्थका धब्बाहरू
निस्वार्थी भाव खोज्छु
मिल्दछन् केवल छायाँहरू
मृत्यु अटल छ भन्नेहरु
मृत्युसंग नै डराउछन्
दुई दिनको यो चोलासँग
मान्छे किन काँप्दछन्
मृत्यु सहज र सरल होस्
दुख भार कसैलाई नपरोस
आडम्बरका ति खोलहरु
कसैले ओढन नपरोस्
दिएको धर्तीमा दानले
कसले पाउछ र मृत्युपछि
यो त केवल भ्रम न हो
मात्र आडम्बर समाज प्रति
माया, स्नेह अनि प्रेम
शब्दका जाल मात्र हुन्
आफ्ना स्वार्थका निम्ति
प्रयोगका यी चाल हुन्
जन्म, मृत्यु मात्र शरीरको
आत्मा त अमर छ रे ।
आफू नमरी स्वर्ग नर्क
कहाँ देखिन्छ रे ।
मृत्यु केवल विश्राम बनोस
मात्र संघर्षको अन्त्य होस् l
चाहना, व्यथा र स्वार्थहरु
शान्त सागरमा विलीन होस् ।
