काठमाडौँ । जर्मन क्लब बायर्न म्युनिखलाई पराजित गर्दै इटालियन क्लब इन्टर मिलान च्याम्पियन्स लिग फुटबलको सेमिफाइनलमा पुगेको छ । बुधबार भएको क्वार्टरफाइनलको दोस्रो लेग २–२ गोलको बराबरी भए पनि समग्रमा ४–३ को जितसहित इन्टर सेमिफाइनलमा पुगेको हो । पहिलो लेगको खेल इन्टरले २–१ ले जितेको थियो ।
दोस्रो लेगमा पूर्वडिफेन्डर बेन्जामिन पावार्डले आफ्नै पूर्वटोलीविरुद्ध गोल गर्दै इन्टर मिलानलाई बुधबार २–२ को बराबरी गराउन महत्त्वपूर्ण भूमिका खेले।
यो पावार्डको इन्टरका लागि पहिलो गोल हो । सन् २०२३ मा बायर्नबाट इन्टरमा आएपछि उनले गोल गरेका हुन् । दोस्रो हाफको शुरुआतमै ह्यारि केनले गोल गर्दै समग्र बराबरीमा ल्याएका थिए। तर इन्टरले तुरुन्तै लउटारो मार्टिनेज र पावार्डको गोलमार्फत खेलमा पुनः अग्रता लियो।
७६औं मिनेटमा एरिक डायरले हेडरमार्फत बराबरी गोल गरेपछि अन्तिम क्षण निकै तनावपूर्ण बने।
