काठमाडौँ । प्रधानमन्त्री कप पुरुष राष्ट्रिय क्रिकेट प्रतियोगितामा मंगलबार बागमती प्रदेश र कर्णाली प्रदेश विजयी भएका छन् ।
सिद्धार्थनगरमा भएको खेलमा बागमतीले गण्डकी प्रदेशलाई ६९ रनले हरायो । पहिले ब्याटिङ गरेको बागमतीले ८ विकेटको क्षतिमा २८८ रन बनायो ।
ईशान पाण्डेले ६९ तथा विपिन आचार्यले अविजित रहँदै ६३ रन बनाए । अर्जुन कुमालले ४ विकेट लिए ।
जवाफमा गण्डकीले ४४ ओभरमा अलआउट हुँदै २१९ रन बनायो । वंश क्षेत्रीले ५५ रन बनाएको इनिङ्समा अलराउन्डर एवं प्लेयर अफ द म्याच ईशान पाण्डेले ४ विकेट लिए ।
अर्को खेलमा कर्णालीले कोशी प्रदेशलाई १२७ रनले हरायो । सिद्धार्थनगरमै भएको खेलमा पहिले ब्याटिङ गरेको कर्णालीले ९ विकेटको क्षतिमा २१८ रन बनायो । अर्जुन घर्तीले ९५ बलमा अविजित रहँदै ८८ रन बनाए । विपिन मअहतोले ३ विकेट लिए ।
जवाफमा कोशीले ३५ ओभरमा अलआउट हुँदै ९१ रन बनायो । ओपनर चिराग साहले सर्वाधिक २५ रन बनाएको इनिङ्समा दिपेन्द्र रावत र सुनिल धमलाले समान ३–३ विकेट लिए ।
अंक तालिका
१० टिम सहभागी प्रतियोगितामा ५ खेलबाट समान १० अंकसहित नेपाल पुलिस क्लब शीर्ष तथा त्रिभुवन आर्मी क्लब दोस्रो स्थानमा रहेको छ ।
लुम्बिनी प्रदेश ५ खेलबाट ८ अंकसहित तेस्रो स्थानमा छ भने सशस्त्र प्रहरीको एपीएफ ५ खेलबाट ६ अंकसहित चौथो स्थानमा छ ।
कर्णाली प्रदेश र बागमती प्रदेश ५ खेलबाट ४ अंकसहित क्रमशः पाँचौँ र छैटौँ स्थानमा छन् ।
मधेस प्रदेश, गण्डकी प्रदेश, कोशी प्रदेश र सुदूरपश्चिम प्रदेशको समान २–२ अंक छ ।
