काठमाडौँ । केपी ओली कप फुटबलको फाइनल खेल अहिले भइरहेको छ । दशरथ रंगशालामा त्रिभुवन आर्मी क्लब र मछिन्द्र क्लब उपाधिका लागि भिडिरहेका छन् ।
मध्यान्तरसम्म मछिन्द्र अगाडि रहेको छ । १–० ले पछि परेको आर्मी दबाबमा रहेको छ । खेलको २९ मिनेटमा मछिन्द्रले अग्रता लिएको हो ।
मछिन्द्र क्लबले शनिबार सम्पन्न दोस्रो सेमिफाइनलमा आयोजक केपी ओली एफसीलाई ४–० गोल अन्तरले पराजित गर्दै फाइनलमा पुगेको हो ।
त्यस्तै शुक्रबार सम्पन्न पहिलो सेमिफाइनलमा आर्मी क्लबले संकटा क्लबलाई २–१ गोल अन्तरले पराजित गर्दै फाइनलमा पुगेको हो ।
फाइनल खेलमा विशेष अतिथिको रुपमा इटालियन फुटबलका लिजेन्ड गोलकिपर गियानलुइगी बुफोन रहेका छन् । उनी आइतबार नै काठमाडौँ आइपुगेका हुन् ।
बुफोनले खेलअघि दर्शकलाई सम्बोधन गर्दै नेपाली फुटबल पनि विश्वकपमा पुग्न सक्ने बताए । उनले फुटबल एक्लैले खेल्ने खेल नभएकाले सबै मिलेर नै अगाडि बढाउनु पर्ने भन्दै शुभकामना दिएका छन् ।
