काठमाडौँ । अन्तर्राष्ट्रिय महिला च्याम्पियनशिप फुटबलको फाइनलमा नेपाल र म्यानमार भिडिरहेका छन् । दशरथ रंगशालाको मैदानमा भइरहेको खेलमा नेपालले दुई मिनेटमा दुई गोल खाएसँगै २–० ले पछि परेको छ । खेलको ६२ औँ मिनेटमा नेपालले पहिलो गोल खायो भने ६४ औँ मिनेटमा अर्को गोल खायो ।
यसअघि नेपालले लगातार आक्रमण गरेको भए पनि आधा दर्जन गोल गर्ने अवसर खेर फालेको थियो ।
यो खेल जितेर नेपाल इतिहास रच्न आतुर देखिए पनि पछि पर्दा भने समस्या भएको छ ।
यसअघि मध्यान्तरसम्म गोलरहित बराबरीमा खेल सकिएको थियो ।
नेपाल अहिलेसम्म १३ ओटा प्रतियोगिताको फाइनलमा पुगेको भए पनि उपाधि भने जित्न सकेको छैन ।
कीर्गिस्तान र लेबननसमेत रहेको प्रतियोगिताबाट दुवै टिम भने शीर्ष दुईमा पर्न नसक्दा फाइनल सम्भावनाबाट बाहिरिएका थिए ।
नेपाल र म्यानमारले दुवै टिमलाई पराजित गर्दै फाइनलमा स्थानमा बनाएका हुन् । लिग चरणमा दुवै टिमले आपसमा २–२ गोलको बराबरी खेलेका थिए ।
सो बराबरीका कारण नेपालको मनोबल बढेको छ । म्यानमार फिफाको वरीयतामा ५५ औँ स्थानमा रहेको छ भने नेपाल १०३ औँ स्थानमा रहेको छ ।
दुई टिमबी आपसमा ५ खेल भएकामा ३ खेल म्यानमारले जितेको थियो भने २ खेलमा बराबरी भएको थियो ।
