काठमाडौँ । भारतको दिल्लीमा भारतीय जनता पार्टी भाजपाको सरकार बन्ने लगभग पक्का भएको छ । गत बुधबार भएको विधान सभाको मतदानको मतगणना शनिबार बिहानदेखि चलिरहँदा भाजपा स्पष्ट बहुमतसहित सरकारमा जाने तय भएको हो । 

७० सिटका लागि भएको मतदानको मतगणना जारी रहँदा भाजपाले कायापलट गरेको हो ।  बहुमतका लागि ३६ सिट आवश्यक भएकामा भाजपाले ४ सिट जितिसकेको छ भने ४४ सिटमा अगाडि रहेको छ । 

सत्तारुढ दल आम आदमी पार्टी आप भने निकै तल रहेको छ । आपले अहिलेसम्म ३ सिट जितेको छ भने १९ सिटमा अगाडि रहेको छ । 

हारसँगै अरविन्द केजरीवाल पुनः मुख्यमन्त्री बन्ने सपना चकनाचुर भएको छ ।

बुधबार भएको चुनावमा ५७.८५ प्रतिशत मत खसेको थियो । 

पहिलो पटक एग्जिट पोल सही सावित

मतदान सकिएपछि एग्जिट पोलले भाजपालाई जिताएको थियो । पहिलो पटक एग्जिट पोल सही सावित भएको हो । विभिन्न ११ ओटा एग्जिट पोलले गरेको अनुमानअनुसार ९ ओटाले भारतीय जनता पार्टी भाजपालाई बहुमत आउने आँकलन गरेका थिए । 

२ एग्जिट पोलले आम आदमी पार्टी (आप) कै सरकार बन्ने अनुमान गरेका थिए । 

पोल आफ पोल्समा भाजपालाई ७० मध्ये ३९, आपलाई ३० र कांग्रेसलाई एक सिटमात्र मिल्ने अनुमान गरिएको थियो । 

त्यस्तै जेभीसी र पाल डायरीले आफ्नो एग्जिट पोलमा अन्यलाई एक एक सिट आउने अनुमान गरेका थिए ।

भाजपालााई बहुमत आउँदा २७ वर्षपछि पुनः सत्तामा फर्कने लगभग पक्का छ । यसअघि सन् १९९३ मा भाजपाले ४९ सिट जितेको थियो । त्यसबेला पाँच वर्षको अवधिमा भाजपाले तीन मुख्यमन्त्री बनाएको थियो । 

दिल्लीमा भाजपाबाट मदनलाल खुराना, साबिह सिंह वर्मा र सुषमा स्वराज मुख्यमन्त्री बनेका थिए । 

हाल तीन जना नेताकै छोराहरु अहिले राजनीतिमा सक्रिय छन् । खुरानाका छोरा हरिश खुराना मोतीनगरबाट र वर्माका छोरा प्रवेश वर्मा नयाँदिल्लीबाट चुनाव लडिरहेका छन् । स्वराजका छोरा बाँसुरी दिल्लीका सांसद छन् । 

यसो भन्छ सर्भे, कसलाई कति सिट ?

सर्वेअनुसार म्याट्रिजले भाजपालाई ३५–४० तथा आपलाई ३२–३७ सिट आउने आँकलन गर्दा कांग्रेसलाई १ सिट छुट्याएको छ । 

पिपुल्स इनसाइटले भाजपालाई ४०–४४ तथा आपलाई २५–२९ सिट आउने अनुमान गर्दा कांग्रेसको भागमा १ सिट रहेको छ । 

त्यस्तै पिपुल्स पल्सले ५१–६० तथा आपलाई १०–१९ सिट आउने आँकलन गर्दा कांग्रेस पत्तासाफ हुने देखाएको छ । 

जेवीसी पोल्सले भाजपालाई ३९–४५, आपलाई २२–३१ तथा कांग्रेसहित अन्यलाई २ सिट आउने अनुमान गरेको छ । 

पी मार्कले भाजपालाई ३९–४९, आपलाई २१–३१ तथा अन्यलाई शून्यदेखि १ सिट आउने आँकलन गरेको छ । 

चाणक्य स्ट्राटजिजले ३९–४४, आपलाई २५–२८ तथा अन्यलाई २ देखि ३ सिट छुट्टाएको छ । 

पोल डायरीले भाजपालाई ४२–५० तथा आपलाई १८–२५ सिट आउने आँकलन गर्दा अन्यले शून्यदेखि २ सिट जित्ने अनुमान गरेको छ । 

डीवी रिसर्चले भाजपालाई ३६–४४ तथा आपलाई २६–३४ सिट जिताउँदा अन्यलाई सिट नै नआउने आँकलन गरेको छ ।

त्यस्तै विप्रिसाइडले भाजपालाई हराउँदा आपलाई जिताएको छ । भाजपाले १८–२३ सिट ल्याउँदा आपले ४६–५२ सिट जित्ने आँकलन गरेको हो । अन्य दलले १ सिटसम्म जित्न सक्ने अनुमान उसको छ । 

माइन्ड ब्रिंकले भाजपालाई २१–२५ सिटसम्म आउने बताउँदा आपलाई ४९ सिटसम्मको स्पष्ट बहुमत आउने आँकलन गरेको छ । 

एसएएसले भाजपालाई ४१ सिटसम्म जित्दा आपले ३० सिटसम्म ल्याउने आँकलन गरेको हो । 

समग्रमा पोल अफ पोल्समा भाजपालाई ३९, आपलाई ३० तथा अन्यको भागमा १ सिट पर्ने देखिएको हो । 

सन् २०२० मा गरिएको एग्जिट पोलमा मात्र एउटा सही भएको थियो । आपले ६२ सिट जित्दा भाजपाले ८ तथा कांग्रेस शून्य भएको थियो । 

सन् २०१५ को एग्जिट पोल सबै गलत भएको थियो । त्यतिबेला आपले ६७ तथा भाजपाले ३ सिट जितेको थियो । कांग्रेस निल भएको थियो । 

कुन कुन दल छन् भिडन्तमा  
लोकसभा चुनावमा इन्डिया ब्लकका साझेदार रहेका पाँच पार्टी विधानसभा निर्वाचनमा भने एक आपसमा भिडिरहेका छन् । 

आम आदमी पार्टी (आप) र कांग्रेस सबै ७० सिटमा आपसमा भिडिरहेका छन् । त्यस्तै कम्युनिष्ट पार्टी अफ इन्डियाले ६, कम्युनिष्ट पार्टी अफ इन्डिया मार्कसिस्ट र कम्युनिष्ट पार्टी अफ इन्डिया मार्कसिस्ट लेलिनिस्टले २–२ सिटमा आफ्ना प्रत्यासी उठाएका छन् । 

भारतीय जनता पार्टी (भाजपा) ले ६८ सिटमा आफ्ना उम्मेदवार उठाएको छ । दुई सिट सहयोगी पार्टीलाई दिएको छ । जसमा जनता दल युनाइटेड (जेडीयू) र लोक जनशक्ति पार्टी–रामविलास (एजेपी–आर) ले एक एक सिट पाएका छन् । 

महाराष्ट्रमा भाजपाको सहयोगी राष्ट्रवादी कांग्रेस पार्टी (एनसीपी) ले ३०सिटमा चुनाव लडेको छ । शिवसेना प्रमुख तथा महाराष्ट्रका उपमुुख्यमन्त्री एकनाथ सिन्देले सबै सिटमा भाजपालाई समर्थन गरेको छ । 

त्यस्तै बहुजन समाज पार्टी (बीएसपी) ७०, असरुद्धीन ओवेसीको अल इन्डिया मजलिस–ए–इत्तिहादुल मुस्लिमिनले १२ सिटमा चुनाव लडेको छ । 

यसअघिको निर्वाचनमा आपले बाजी मारेको भए पनि यसपालि भने आपको राजनीति बिग्रिएको छ । भाजपाले सुधार गर्ने अपेक्षा गरिएको छ । 

आपका ६३ प्रतिशत उम्मेदवारमा आपराधिक मुद्दा रहेको छ । आपका ४४ जना उम्मेदवारमाथि उक्त केस रहेको हो । 

त्यस्तै कांग्रेसका २९ तथा भाजपाका २० उम्मेदवार छन् । 

पाँच उम्मेदवारको सम्पत्ति सय करोड भारु भन्दा बढी छ भने ६९९ उम्मेदवारमा महिला संख्या मात्र ९६ रहेको छ । 

दिल्लीमा १८ प्रतिशत मतदाता स्विङ भोटर्स हुन् । तिनै १८ प्रतिशतले नै जितहारको कायापलट गर्ने छन् ।