प्यालेस्टिनी शरणार्थीहरूको हेरचाह गर्न नर्वेले दियो करिब अढाई करोड डलर, इजरेलले लगायो प्रतिबन्ध
हाम्रा कुरा
प्रकाशित २०८१ माघ १८ शुक्रबार
1.5k
Shares
काठमाडौँ । नर्वे सरकारले बिहीबार प्यालेस्टिनी शरणार्थीहरूको हेरचाह गर्न मद्दत गर्ने संयुक्त राष्ट्र एजेन्सीलाई दुई करोड ४० लाख डलर सहयोग गर्ने बताएको छ । बिहीबार नै इजरेलले उक्त समूहलाई इजरेली क्षेत्रमा काम गर्न प्रतिबन्ध लगाएको थियो ।
“गाजा भग्नावशेषमा छ र युएनआरडब्लुएको सहयोग पहिलेभन्दा बढी आवश्यक छ”, नर्वेका विदेशमन्त्री एस्पेन बार्थ इडेले एक वक्तव्यमा भने, “प्यालेस्टिनका लागि यो अत्यन्त नाटकीय छ कि इजरेली कानूनहरू लागु भएका छन् जसले व्यवहारमा युएनआरडब्लुएलाई काम गर्नबाट रोक्न सक्छ ।”
बिहीबारदेखि युएनआरडब्लुएलाई इजरेली भूमिमा सञ्चालन गर्न प्रतिबन्ध लगाइएको छ तथा यो र इजरेली अधिकारीहरू बीचको सम्पर्क निषेध गरिएको छ । इजरेलको सर्वोच्च अदालतले बुधबार राति प्रतिबन्धको चुनौतीलाई अस्वीकार गरेको छ ।
युएनआरडब्लुएले ७० वर्षभन्दा बढी समयदेखि मध्यपूर्वका प्यालेस्टिनी शरणार्थीहरूलाई सहयोग गर्दै आएको छ र सन् २०२३ मा हमाससँगको इजरेलको युद्ध सुरु भएदेखि गाजामा पुगेको खाद्यान्न सहयोगको ६० प्रतिशत ल्याएको छ ।
तर इजरेली अधिकारीहरूले यसलाई पटक–पटक लडाकू समूहहरूको आडको रूपमा रहेको र देशको सुरक्षालाई कमजोर बनाएको आरोप लगाउँदै आएका छन् । यो शत्रुता हमासको सन् २०२३ अक्टोबर ७ को इजरेलमाथिको आक्रमणपछि बढ्यो र यसमा युएनआरडब्लुएका केही कर्मचारी आक्रमणमा सहभागी भएको आरोप लगाइएको थियो ।
फ्रान्सका पूर्व विदेशमन्त्री क्याथरिन कोलोनाको नेतृत्वमा भएको अनुसन्धानको शृङ्खलाले युएनआरडब्लुएमा केही ‘तटस्थता–सम्बन्धित मुद्दाहरू’ फेला पारेको थियो, तर इजरेलले आफ्नो मुख्य आरोपको प्रमाण उपलब्ध गराएको थिएन ।
आरोप लागेपछि धेरै दाताले युएनआरडब्लुएका लागि आफ्नो समर्थन कटौती गरे । यद्यपि लगभग सबैले आफ्नो कोष पुनः सुरु गरेका छन् ।
गत मे महिनामा स्पेन र आयरल्यान्डसँगै प्यालेस्टिनी राज्यलाई मान्यता दिएपछि विशेषगरी नर्वे र इजरेलबीचको सम्बन्ध पछिल्ला वर्षहरूमा बिग्रिएको छ ।
