पोखरा । पोखरामा पाँचौँ टाइगर कप राष्ट्रिय तथा अन्तर्राष्ट्रिय क्लब महिला तथा पुरुष भलिबल प्रतियोगिताका लागि गण्डकी प्रदेशले तीन विदेशी खेलाडी अनुबन्ध गरेको छ ।
गण्डकीले पुरुषतर्फ ट्युनिसियाका फाहिम मिलाडीसहित तीन खेलाडीलाई टिममा अनुबन्ध गरेको प्रदेश भलिबल संघका अध्यक्ष नवीन गुरुङले जानकारी दिए ।
फाहिमसहित केन्याका निकोशल मातुयी र कंगोका यानिक सेशालाई गण्डकीले टोलीमा अनुबन्ध गरेको हो ।
अन्य खेलाडीको हकमा भने छलफल गरेर घोषणा गर्ने अध्यक्ष गुरुङले बताए ।
गण्डकी अघिल्लो संस्करणको उपविजेता हो । यसपटक भने गण्डकीले महिला टोलीलाई सहभागी बनाएको छैन ।
टाइगर कपमा यस पटक महिला र पुरुषतर्फ छ-छ टोलीले सहभागिता जनाउने भएका छन् ।
यस वर्षको प्रतियोगिता विजेताले पाँच लाख ८५ हजार पाँच सय ५ रुपैयाँ प्राप्त गर्नेछन् । यस्तै उपविजेताले दुई लाख ८५ हजार पाँच सय ५५ रुपैयाँ प्राप्त गर्ने छन् ।
तृतीय हुने टोलीले एक लाख ८५ हजार पाँच सय ५५ रुपैयाँ पाउने आयोजकले जनाएको छ ।
प्रतियोगिताको सर्वोत्कृष्ट खेलाडीले २५ हजार सात सय ७७ रुपैयाँ नगद पुरस्कार प्राप्त गर्नेछन् ।
साथै विधागततर्फ उत्कृष्ट हुनेलाई समान १० हजार पाँच सय ५५ रुपैयाँ प्रदान गरिने बताइन्छ ।
