एनपीएलमा सुदूरसँग काठमाडौँ निरीह, नरेन साउदले लिए पाँच विकेट [फोटोफिचर]
हाम्रा कुरा
प्रकाशित २०८१ मंसिर २० बिहिबार
383
Shares
काठमाडौँ । नेपाल प्रिमियर लिग (एनपीएल) टी–२० क्रिकेटमा सुदूरपश्चिम रोयल्सले शानदार जित हासिल गरेको छ । लिगको नवौँ खेलमा काठमाडौँ गुर्खाजलाई ७३ रनले हराउँदै सुदूरपश्चिम रोयल्सले लगातार दोस्रो जित हासिल गरेको हो ।
त्रिवि कीर्तिपुर मैदानमा पहिले ब्याटिङ गरेको सुदूरपश्चिमले ६ विकेटको क्षतिमा १६७ रन बनायो । ब्रान्डन म्याकमुलेनले ५३, कप्तान दिपेन्द्र सिंह ऐरीले ४३ तथा विनोद भण्डारीले ३५ रन बनाए । काठमाडौँको रशिद खानले २ विकेट लिए ।
जवाफमा काठमाडौँले १५.५ ओभरमा अलआउट हुँदै ९४ रनमात्र बनाउन सक्यो । स्टेफेन एस्किनाजीले सर्वाधिक ३७ रन बनाएको इनिङ्सलाई ध्वस्त पार्ने क्रममा नरेन साउदले ३.५ ओभरमा १५ रन खर्चेर ५ विकेट लिए ।
त्यस्तै अबिनाश बोहराले २ विकेट झारे । यो हारसँगै काठमाडौँको ३ खेलमा २ अंकमात्र छ भने २ खेलमा ४ अंकको सुदूरपश्चिम दोस्रो स्थानमा पुगेको छ ।
तीन खेलबाट ६ अंकसहित जनकपुर बोल्टस् शीर्ष स्थानमा रहेको छ ।
यसअघिका खेल
– आठौँ खेलमा जनकपुर बोल्ट्सले पोखरा एभेन्जर्सलाई ७ विकेटले पराजित गर्यो ।
–सातौँ खेलमा विराटनगर किंग्सले लुम्बिनी लाइन्समाथि २ विकेटको रोमाञ्चक जित हासिल गर्दै पहिलो जित हासिल गरेको छ । लुम्बिनीबाट पाएको १९२ रनको फराकिलो चुनौती विराटनगरले १९.५ ओभरमा ८ विकेटको क्षतिमा पूरा गर्यो ।
– छैटौँ खेलमा काठमाडौँ गुर्खाज विजयी भएको छ । काठमाडौँले कर्णाली याक्सलाई ४ विकेटले पराजित गरेको हो ।
– पाँचौ खेलमा चितवन राइनोजले पोखरा एभेन्जर्सलाई हराएको छ । पोखरा ८८ रनले पराजित भएको हो ।
– चौथो खेलमा सुदूरपश्चिम रोयल्सले विराटनगर किंग्सलाई ९० रनले हरायो । सुदूरले ७ विकेटको क्षतिमा १८२ रन बनाएकामा विराटनगर ९२ रनमा समेटियो ।
– तेस्रो खेलमा जनकपुर बोल्टसले कर्णाली याक्समाथि ८ विकेटको जित हासिल गरेको हो ।
–दोस्रो खेलमा चितवन राइनोज विजयी भएको छ । विजयी शुरुआत गर्ने क्रममा चितवनले काठमाडौँ गुर्खाजलाई ५ विकेटले पराजित गरेको हो ।
–उद्घाटन खेलमा जनकपुर बोल्टसले विराटनगर किंग्समाथि शानदार ८ विकेटको जित हासिल गरेको थियो ।
